Sumqayıt şəhər icra hakimiyyətində bu gün keçirilən müşavirədə təhsil sahəsinə toxunan icra hakimiyyətinin başçısı Zakir Fərəcov məktəblərdə və bağçalarda özbaşınalığın hökm sürdüyünü diqqətə çatdırıb: "Vaxt var idi Sumqayıt abituriyentləri qəbul imtahanlarında ən yüksək nəticələr göstərirdi. Amma indi bu nəticələr xeyli aşağı düşüb”.

Z.Fərəcov bağçalarda və tibb ocaqlarında olan mənfi durumdan, pis şəraitdən, neqativ hallardan danışıb. O qeyd edib ki, son 1 həftə ərzində Sumqayıtda bir çox yerlərdə olub, məktəb, bağça, tibb müəssisələrin durumu ilə şəxsən tanış olub.

Şəhər müşavirəsində görülən işlərlə bağlı qısa hesabatla çıxış üçün söz Sumqayıt Şəhər Təhsil Şöbəsinin müdir əvəzi Vaqif Ələkbərova verilib. Vaqif Ələkbərov təhsil sahəsində mövcud olan problemlərdən məktəb və bağçaların təmir olunma zərurətindən söz açıb. O bildirib ki, şəhər ərazisində mövcud olan 50 ümumtəhsil məktəbindən 29-u təmirsiz haldadır. Şəhər ərazisində fəaliyyət göstərən 41 saylı orta məktəb isə tam qəzalı vəziyyətdədir. Hazırda buna bənzər məktəblərdə acınacaqlı vəziyyət hökm sürür.

Vurğulanıb ki, 46 uşaq bağçasının mövcud təmirə ehtiyacı var.

Zakir Fərəcov təhsil sahəsində həlli vacib olan məsələlərin aradan qaldırılmamasını əsas gətirərək Vaqif Ələkbərovu tutduğu vəzifədən azad edib.

O, Sumqayıt şəhər təhsilində vəziyyətin ürəkaçan olmadığını, çoxlu problemlərin olduğunu bildirib. İcra başçısı qeyd edib ki, təhsil sahəsində çalışanlar yalnız təhsillə məşğul olmalıdırlar: "Məktəblərdəki təmir zərurətini və şəraitsizliyi başa düşürəm. Bəs davamiyyət?!Bəs məktəb və bağçaların həyətinin bərbad olması?!Bunun da günahı Eldar Əzizovdadır?! Mən heç kimə onun ardınca danışmağa rəvac vermirəm.Başçı hər bir şeyi çatdıra bilməz.Sizdən də təşəbbüslər olmalıdır.Əgər məktəblərin həyətində güllər əkilmirsə, ağaclar suvarılmırsa, buna başçı nə etsin?! Kim icazə verib ki, 3 saylı məktəbin həyətində məcburi köçkünlər ev tiksin?! Axı bura məktəbin həyətidir?! Niyə nəzarət edilməyib?! Bundan sonra tədbirlər zamanı dərsdən qalma, qəbul zamanı pul alma məsələləri tamamilə yığışdırılacaq”.

Xeberle.com