"Sumqayıt şəhəri təhsildə ən geri qalmış bir bölgədir. Sumqayıtda 4-5 məktəbi çıxmaq şərtilə məktəblərin hamısı təmirsiz, istilik sistemi yoxdur, damları su axıdır. Bunula yanaşı nizam-intizam, dərsə davamiyyat yoxdur. Tədrisin keyfiyyəti isə aşağı səviyyədədir. Onun nəticəsidir ki, bizim bu gün əldə etdiyimiz nəticələr çox aşağı səviyyədədir. Mən istəməzdim ki, əvvəllər öz təhsili ilə meydan oxuyan Sumqayıt şəhəri geri qalsın. Amma biz bu problemləri aradan qaldıracağıq və yenə də Sumqayıt təhsilinin səviyyəsi respublikada ilk yerlərdən birini tutacaq. "

Bu sözləri Sumqayıt şəhər təhsil işçilərinin sentyabr konfransında çıxışı zamanı İcra Hakimiyyətinin Başçısı Zakir Fərəcov deyib. O, bildirib ki, Sumqayıtda bir sıra məktəb və bağçaların şəraitlə tanış olub və təhsil ocaqlarının çox acınacaqlı vəziyyətdə olduğunun şahidi olub. Əvvəllər Sumqayıt təhsilinin ölkədə qabaqcıllardan olduğunu deyən Z. Fərəcov hazırda şəhərdə təhsilin səviyyəsinin çox aşağı olduğunu diqqətə çatdırıb və pedaqoji kollektivə öz iradlarını bildirib: "Bütün məktəblər tələbə qəbulunun sayına görə ilin sonunda mənə hesabat verəcəklər. Mənə verilən tapşırığı yüksək səviyyədə yerinə yetirən məktəb direktoru lazımdır. Çalışmalız ki, nöqsanları aradan qaldırasınız. Məktəb direktorlarından, bağça müdirlərindən tələb edirəm ki, valideynlərdən heç nə istəməsinlər."