Sumqayıtda avtomobillərin hərəkət etdiyi yolla gedib gəlmək istənilən əlilə ciddi çətinlik törədir. Bu həm də onlar üçün çox təhlükəlidir. Yollar salınarkən, yaxud təmir-bərpa işləri aparılarkən əlillər, gözdən əlillər, karlar, yeriyə bilməyənlər şikəstlər nəzərə alınmır. Düzdür, şəhərin müəyyən yerlərində - səkilərdə, pilləkənlərin kənarında panduslar var. Amma bu, çox azdır, hətta barmaqla sayılacaq qədərdir. Üstəlik, əlil arabasında olan vətəndaşın pandusa yaxınlaşanadək səkiyə necə qalxacağı sual doğurur. Bəzi pandusların maillilik dəcəsi nəzərə alınmadığından, onlar demək olar ki, yararsızdır.

Sumqayıtda inzibati tikililəri götürsək, (xəstəxanaları çıxmaq şərti ilə) pandus yalnız ASAN xidmətin, Sumqayıt şəhər Paralimpiya Kompleksinin, Əmək və Əhalinin Sosial Müdafiəsi Nazirliyinin Sumqayıt şəhər şöbəsinin və "Əlil Sahibkarlar Təşkilatı” İctimai Birliyinin binasında quraşdırılıb.

Tikinti üzrə son təlimata əsasən, yeni binaların layihələndirilməsi zamanı əlil arabalarının hərəkəti məsələsinə xüsusi diqqət yetirib, yəni liftlərin, dəhlizlərin, tualetlərin ölçüləri əlil arabalarının hərəkəti üçün yararlı olmalıdır. Amma reallıqda bu təlimatlara riayət olunmur. Araşdırmalar göstərir ki, Sumqayıtda yeni tikilən binaların əksəriyyətində əlillərin hərəkəti üçün şərait yaradılmayıb.

"Əlil Sahibkarlar Təşkilatı” İctimai Birliyinin sədri Mirzə Məmmədvəliyev  Sumqayıtda aparılan yenidənqurma, abadlaşdırma işləri zamanı hərəkət etməsi əngəlli insanların, uşaq arabalarının rahat hərəkəti əksər yerlərdə nəzərə alınmayıb. Bu da onların hərəkətinə mane olmaqla yanaşı, həyatlarına da təhlükə yaradır.

Problem təkcə əlilliyi olan şəxslər üçün deyil, körpəsi olan hər bir gənc ailə üçün bir əngəldir. Sumqayıtın küçə və prospektləri ilə uşaq arabasını keçirməkdən ötrü gərək əziyyət çəkəsən. Şəhərin mərkəzi küçələri sayılan Sülh, Səməd Vurğun, Azərbaycan və Heydər Əliyev prsopektində uşaq və əlil arabasında hərəkət edənlər nəzərə alınmayıb. Sanki onlar vətəndaşımız deyil, sanki onlar unudulub və bizimlə eyni hüquqlara malik deyillər.

Gəlin əlillərin də hüquqlarını tanıyaraq onların mənzilləri xaricində rahat, təhlükəsiz hərəkəti üçün şərait yaradaq.

Ümid edək ki, Sumqayıt rəhbərliyi şəhərdəki bu problemə operativ reaksiya veriləcək və problem tədricən aradan qaldırılacaq.

Ramil Zeynallı, Elnur Ağayev, Coşqun Məmmədov

Sumqayıt TV