Artıq xəbər verildiyi kimi, Azərbaycan Respublikası Prezidentinin 2 sentyabr 2015-ci il tarixli Sərəncamı ilə Sumqayıt Şəhər İcra Hakimiyyətinin başçısı vəzifəsinə cənab Zakir Fərəcov təyin olunmuşdur. Qeyd etmək lazımdır ki, cənab Zakir Fərəcovun Abşeron RİH-nin başçısı vəzifəsində çalışdığı müddətdə qazanılan uğur və nailiyyətlər bu rayonun tərəqqisinə misilsiz tövhələr vermişdi. Abadlıq işləri, əhalinin sosial-məişət problemlərinin həlli, yeni təhsil və səhiyyə müəssisələrinin tikintisi və yolların rekonstruksiyası istiqamətində görülən işlər sakinlərin də böyük razılığına səbəb olmuşdu. Həmçinin xüsusi olaraq qeyd etmək lazımdır ki, cənab Zakir Fərəcovun vətəndaşların problem və qayğıları ilə dərindən maraqlanması, mövcud problemlərin həlli istiqamətində operativ və effektli tədbirlər görməsi rayon ictimaiyyəti tərəfindən hər zaman yüksək qiymətləndirilirdi. Mütəmadi olaraq müxtəlif mənbələrdən əldə etdiyimiz məlumatlarda da vurğulanırdı ki, Abşeron RİH-də sakinlərlə münasibət ölkə qanunlarına riayət olunmaqla və insan hüquqlarına hörmət prinsipləri əsasında qurulur. Bütün bunları nəzərə alaraq demək olar ki, bundan sonra Sumqayıt şəhərinin bir çox sahələrində hələ də müşahidə olunan nöqsanların aradan qaldırılması istiqamətində icra strukturlarının eyni prinsipiallıq və obyektivlik əsasında fəaliyyətinin şahidi ola biləcəyik.Nöqsanlar isə, bu gün Sumqayıtın xüsusilə təhsil və səhiyyə sahələrində kifayət qədərdir. Bu arada qeyd edək ki, artıq dünən Sumqayıt Şəhər İcra Hakimiyyətində cənab Zakir Fərəcov şəhərdə fəaliyyət göstərən dövlət qurumlarının rəhbərləri ilə ilk görüşünü keçirib. Diqqətəlayiq haldır ki, ŞİH rəhbərinin tənqid hədəfi ilk növbədə Təhsil şöbəsinin müdiri əvəzi Vaqif Ələkbərov olub. Bu xüsusda çıxış edən cənab Zakir Fərəcov iclas zamanı deyib ki, şöbə müdiri əvəzi sentyabrın 8-də şəhərdəki bütün məktəb direktorlarının hərəsindən 500 manat pul yığaraq, guya ayın 10-da keçiriləcək konfrans ərəfəsi kimlərəsə hədiyyə alınacağını bildirib. Vaqif Ələkbərovun digər qanunsuz əməllərini də sadalayan icra başçısı onu birbaşa iclas zalından qovub. Qeyd etməliyik ki, qəzetimizdə dərc etdiyimiz materiallarda biz dəfələrlə Vaqif Ələkbərov tərəfindən yol verilən müxtəlif qanun pozuntularından bəhs etmişdik.
Lakin təəssüflər olsun ki, Sumqayıt ŞİH-nin keçmiş rəhbərliyi tərəfindən məlumatlara heç bir reaksiya göstərilməmişdi.Həmçinin eyni sözləri bu gün Sumqayıt Şəhər Səhiyyə İdarəsinin müdiri Ələkbər Tağıyevin fəaliyyəti barədə də demək olar. Artıq uzun müddətdir ki, redaksiyamıza daxil olan məlumatlarda Ələkbər Tağıyevin öz işində yol verdiyi rüşvətxorluq və digər korrupsiya əməllərindən bəhs edilir. Aldığımız açıqlamalarda bildirilir ki, Sumqayıtın səhiyyə sistemi bu gün olduqca bərbad haldadır. Belə vəziyyətin yaranmasını isə şikayətçilər birbaşa Ələkbər Tağıyevin yarıtmaz fəaliyyəti ilə bağlayırlar. Məlumat üçün bir daha qeyd edək ki, bu gün Sumqayıt Şəhər Səhiyyə İdarəsinin tabeliyində 7 xəstəxana, 2 Doğum evi, 5 Dispanser, 3 şəhər poliklinikası, "Kimyaçı” poliklinikasi, 2 Tibbi Sanitar Hissə, 5 uşaq poliklinikası, 2 təsərrüfat hesablı stomatoloji poliklinika, Uşaq stomatoloji poliklinikasi və Uşaq sanatoriyasında vətəndaşlara tibbi xidmətlər göstərilir. Lakin bu xidmətlərin olduqca aşağı səviyyədə olması və dövlət tibb müəssisələrində xəstələrdən tələb olunan pul ödənişləri yerli sakinlərin ciddi narazılıqlarına səbəb olur. Məlumatlarda xüsusi olaraq vurğulanır ki, Sumqayıtın xəstəxanaları üçün dərman preparatları alınan zaman müvafiq sənədlərdə onların qiymətləri üç-dörd dəfə artıq göstərilir. Beləliklə də şəhərin tibb müəssisələrində Səhiyyə Nazirliyinin xəstələrin ərzaq və dərman preparatları ilə təminatlarına dair verdiyi təlimatlar kobud şəkildə pozulur. Bir çox hallarda hətta vərəm və şəkərli diabet xəstələri belə pulsuz dərmanla təmin olunmurlar. Əhaliyə göstərilməli olan pulsuz xidmətlər demək olar ki, formal xarakter daşıyır. Həmçinin məlumatlarda yerli xəstəxanaların ərzaq təminatı məsələsinin də Ələkbər Tağıyev tərəfindən artıq çoxdan maxinasiya obyektinə çevrildiyi qeyd olunur.
Digər tərəfdən isə, Sumqayıtın bəzi tibb müəssisələrinin rəhbərləri birbaşa Ələkbər Tağıyevin himayəsinə güvənərək, rəhbərlik etdikləri səhiyyə ocaqlarında daha böyük qanunsuzluqlar törədirlər. Aldığımız məlumatlarda belə müəssisələrə misal olaraq, Sumqayıt şəhər 1 saylı Doğum Evinin və Sumqayıt şəhər 1 saylı uşaq poliklinikasının adları çəkilir.Qeyd edək ki, redaksiyamıza Sumqayıt şəhər 1 saylı Doğum Evinin fəaliyyətində müşahidə olunan ciddi qanun pozuntularına dair məlumatlar bu gün də daxil olmaqda davam edir və artıq bir neçə müddətdir ki, qəzetimizin səhifələrində həmin məlumatlar əsasında hazırladığımız materialılar dərc olunur. İlk növbədə həmin materiallarda biz göstərmişdik ki, bu müəssisənin qəbul şöbəsində doğuşa gələn xanımlardan dərhal 350 manat məbləğində ödəniş etmək tələb olunur. Hətta maraqlananlara belə bir məlumat da verilir ki, həmin məbləğin 80 manatı doğuşu qəbul edəcək həkimə, 40 manatı kiçik personala və qalan 230 manatı da baş həkim Sevda İsgəndərliyə çatır. Həmçinin qeyd olunmuşdu ki, müəssisənin sanitar və texniki personalı hər ay 5 manat, tibb bacıları 10 manat və həkimlər isə 20 manat olmaqla "fond pulu” ödəmək məcburiyyətindədirlər. Mənbə bildirir ki, bütün bu rəqəmlər bir müddət əvvəl Səhiyyə Nazirliyi tərəfindən 1 saylı Doğum Evində keçirilmiş xüsusi yoxlama zamanı müəssisənin Solmaz İsmayılova adlı bir əməkdaşında aşkarlanmış dəftərçədə qeyd olunmuşdu. Solmaz xanımın adı müəssisənin ştat cədvəlində liftçi kimi qeyd olunsa da, onun əsas vəzifəsi hər ay siyahı üzrə ödənişləri yığıb, baş həkimə təhvil verməkdən ibarət olub. Lakin bu qanun pozuntuları bəlkə də 1 saylı Doğum Evinin fəaliyyətində müşahidə edilən ən "ziyansız” nöqsanlardır. Belə ki, etibarlı mənbənin verdiyi məlumata görə, bu tibb müəssisəsində qeyri-qanuni şöbənin fəaliyyətindən tutmuş, uşaq alverinə qədər istənilən növ cinayət tərkibli əməlləri müşahidə etmək olar. Aldığımız növbəti məlumatda bildirilirdi ki, bu gün baş həkim rəhbərlik etdiyi Doğum Evində tamamilə qeyri-qanuni olaraq, uşaq-reanimasiya şöbəsi yaratmışdır. Halbuki, qaydalara görə bu şöbəyə yerləşdirilməsi tələb olunan zaman, uşaqlar təcili olaraq müvafiq xəstəxanaya köçürülməlidirlər. Lakin Sevda İsgəndərli bu məsələyə də kommersiya baxımından yanaşmışdır. Belə ki, açdığı şöbəni "öz vəsaitləri” hesabına aldığı bəzi tibbi avadanlıqlarla təchiz edən baş həkim, hazırda buraya köçürdüyü uşaqların valideynlərindən hər gün üçün 20 manat pul alır. Açıqlama verən başqa bir mənbə isə, 1 saylı Doğum Evinin rəhbərliyini uşaq satmaqda ittiham etmişdi. Bu xüsusda məlumatda bildirilirdi ki, 2015-ci il yanvar ayının 14-də Fəidə Mirzəyeva adlı bir gənc qadın bu müəssisədə dünyaya bir oğlan uşağı gətirib. Lakin doğuşdan sonra, bu gənc ana naməlum səbəblərdən öz övladından imtina edib və körpəni doğum evində qoyaraq, onu tərk edib. Qanunlara görə, belə hallarda körpə uşaq evinə təhvil verilməlidir. Lakin 1 saylı Doğum Evində Mikayıl adı verilmiş bu uşağı düz iki ay saxlayırlar. İki aydan sonra isə uşağa "müştəri” çıxır və 10 min manat müqabilində Mikayılı alır.Bu yaxınlarda Sumqayıt şəhər sakini Əliyev Camal Həşim oğlu tərəfindən təqdim olunmuş ərizədə isə, Sumqayıt şəhər 1 saylı uşaq poliklinikasının baş həkimi Ülviyyə Müzəffərova və Şəhər Səhiyyə İdarəsinin müdiri Ələkbər Tağıyev ciddi qanun pozuntularında ittiham olunurdular. Ərizədə deyilir: "Oğlum Əliyev Sadiq, 2001-ci təvəllüdlü, anadan gəlmə serebral iflic, epilepsiya yataq xəstəsidir. Dövlət tərəfindən imtiyazlı pulsuz ekkopat xrono dərmanı ilə təmin olunurdu. Lakin 2014-cü ildən dərmanların verilməsində mütəmadi problemlər yarandı. Həkimə deyəndə ki, dərmanlar çatmır, dedi ki, mənə belə göstəriş veriblər və məsləhət gördü ki, dərmanların çatmayan hissəsini (demək olar il ərzində 5-6 dəfə) gedin aptekdən borc götürün, resepti aparanda çıxsınlar. Beləliklə bizi məcbur edirdilər ki, dərmanları öz vəsaitimiz hesabına alaq. 2014-cü ildə 3 dəfə 1 saylı uşaq poliklinikasının baş həkimi Ülviyyə Müzəffərovaya müraciət etdim, sonra Sumqayıt şəhəri səhiyyə idarəsinin müdiri Ələkbər Tağıyevə şikayətimi bildirdim. Əfsuslar olsun ki, şikayətimə baxılmadı. Ona görə ki, Ələkbər Tağıyev, baş pediator Xalidə xanım, baş həkim Ülviyyə Müzəffərova əlbir olaraq, verilməyən dərmanları mənimsəyirlər…”Ümumiyyətlə, bu gün Sumqayıtın bir çox tibb müəssisələrində primitiv səviyyədə göstərilən tibbi xidmətlərə görə yüksək məbləğlərin alınması, dərman preparatları ilə spekulyasiyalar, xəstəxanalarda cərrahiyə və digər tibbi əməliyyatların antisanitariya şəraitində həyata keçirilməsi kimi faktlar da müşahidə olunmaqdadır. İnfeksion xəstəliklərin profilaktikası məsələsində isə bəzi müəssisələrdə ümumiyyətlə tam fəaliyyətsizliyin şahidi olmaq olar. Bəzi mənbələr tərəfindən təqdim olunan məlumatlarda isə, bir çox hallarda infeksiya daşıyıcılarının aşkarlanma faktlarının şəhər Səhiyyə İdarəsinin rəhbərliyi tərəfindən gizlədildiyi də iddia olunur.
Qeyd olunduğu kimi, bütün bu problemlər artıq uzun müddətdir ki, Sumqayıt səhiyyəsinin inkişafını əngəlləyən əsas məqamlar kimi çıxış etməkdədirlər. Lakin dünən Sumqayıt Şəhər İcra Hakimiyyətində cənab Zakir Fərəcovun rəhbərliyi ilə keçirilən iclasın nəticələri belə deməyə əsas verir ki, artıq sumqayıtlılar ən yaxın günlərdə bütün bu problemlərin həllinin şahidi ola biləcəklər. Ehtimal etmək olar ki, cənab Zakir Fərəcovun Sumqayıtda Vaqif Ələkbərovun qovulması ilə start vediyi kadr islahatları, yaxın günlərdə Şəhər Səhiyyə İdarəsində də davam etdiriləcəkdir.
