Nəqliyyat müfəttişləri ilə dövlət yol polisi əməkdaşları qanunsuz sərnişindaşıma ilə məşğul olan sürücüləri aşkarlayaraq cəzalandırıb. Bu proses mübahisəsiz ötüşməyib.

ANS TV-nin məlumatına görə, Bakı-Sumqayıt yolunda baş verən ağır yol hadisəsinin fonunda Nəqliyyat Nazirliyinin əməkdaşları Sumqayıt şəhərində reydlərlə başlayıb. 

Kiçik tutumlu mikroavtobusların qanunsuz sərnişin daşımasının qarşısını almaq üçün lisenziyasız sürücülərin müəyyən edilməsi istiqamətində görülən tədbirlər qarşıdurmasız ötüşməyib.

Tədbir zamanı lisenziyası olmayan sürücü Post Patrul Xidmətinin əməkdaşları və Nəqliyyat Nazirliyinin işçilərinin müdaxiləsi nəticəsində ərazi üzrə polis bölməsinə aparılıb.

Baş Dövlət Yol Polisinin və Nəqliyyat Nazirliyinin avtomobillərini uzaqdan görən bəzi sürücülər elə yerindəcə qoşa xəttin üstündən keçərək geri dönürdülər. Amma bununla onlar qaça bilmirdilər.

"İntizamsız sürücülərə qarşı yollarda reydlər keçiririk. Qaydaları kobud şəkildə pozan sürücülər cərimə olunur. Fürsətdən istifadə edərək buradan Sumqayıt şəhər ictimaiyyətinə müraciət edirəm qanunsuz fəaliyyət göstərən maşrutların xidmətindən istifadə etməyin. Bu cür ağır qəzalardan özünüzü qoruyun”, - deyə nəqliyyat müfəttişi Vüqar Nuriyev bildirib.

Verilən məlumata görə, anoloji tədbirlər mütəmadi olaraq davam etdiriləcək. 

Odur ki, sürücülük vəsiqəsi və ya müvafiq lisenziyası olmayan sürücülər bu vacib sənədi vaxtında almağa tələsin.