Doğrudanmı maşinist sərnişinləri Sumqayıt yerinə azıb Siyəzənə aparıbmış?

Yenicə fəaliyyətə başlayan Bakı-Sumqayıt qatarının ətrafında söz-söhbətlər səngimək bilmir. Bununla bağlı narazılıqlara sosial şəbəkələrdə, eləcə də sərnişinlər arasında tez-tez rast gəlinir.

Bir neçə gün öncə ölkə Bakı-Sumqayıt qatarının yolunu azaraq Sumqayıt əvəzinə Siyəzənə getməsi ilə bağlı iddialar yəqin ki, hamınızın yadındadır. 

Hadisə şahidlərinin sözlərinə görə hətta sərnişinlərdən bəziləri qatarın qaçırıldığını belə düşünüblər. Bu minvalla bərk qorxuya düşən sərnişinlərdən özündən gedənlər, halı pisləşənlər də olub. Bəzi sərnişinlər ailələrinə bu barədə sms də göndəriblər.

Həmin qatarda olan sərnişinlərdən Baxış Süleymanov Ölkə.Az-a açıqlamasında bildirib:

"Saat 19:25-də qatar stansiyadan Sumqayıta tərəf hərəkət etməyə başladı. Yolun uzandığını və qatarın isə ünvana çatmaq bilmədiyini görərək sərnişinlərdən bəziləri narahat olaraq saatına baxdı. Saatın 20:15 olduğunu gördükdən sonra nəzarətçidən niyə hələ də qatarın mənzil başına çatmadığını soruşdu. Cavabında isə "bilmirəm" eşitdikdə bir neçə nəfər pəncərədən harada olduğumuza baxdı. Elə təşviş də bundan sonra başladı. Daha sonra maşinist qatarı saxlayaraq 10 dəqiqə gözlədi. Sonradan isə geriyə hərəkət etməyə başladıq. Təxminən 30 dəqiqə sonra isə Sumqayıtda olduq. Saat isə 21:20 olmuşdu".

Azərbaycan Dəmir Yolları QSC-nin Sərnişin Daşımaları Departamentinin rəisi Elyar Muradov hadisə ilə bağlı mətbuata verdiyi açıqlamada deyilənlərin yalan və nağıl olduğunu bildirmişdi, hətta qatarın gecikməsini də inkar etmişdi.
Qatarın Siyəzənə getməsi iddiası ilə bağlı videolar da çəkilib sonradan sosial şəbəkələrdə yayılıb. 

Amma Azərbaycan Dəmir Yolları QSC-nin mətbuat katibi Nadir Əzməmmədov Modern.az saytına deyib ki, bunlar qarayaxmadan başqa bir şey deyil:

"O videoların hamısı quramadır. Bunu kimlərsə məqsədli şəkildə hazırlayıb. Əgər real görüntüdürsə, ünvan görünməli idi. Təsvirdə ünvan yoxdursa, deməli o, təsdiq olunan məlumat deyil. Həmin görüntüdə qatarın içi boşdur, sərnişinlər ayaq üstə gəzişir və qapını açmağa çalışırlar. Qatar dayanmamış qapı heç vaxt açılmır”.

Nadir Əzməmmədov "Azərbaycan Dəmir Yolları” rəsmilərinin açıqlamalarının yalan olduğunu idda edənlərə də cavab verib:
"Biz etiraf etməyi bacarırıq. Əgər belə bir hadisə baş vermişdisə, onu gizlətmək yox, sadəcə, səbəblərini izah etməklə açıqlama verərdik.

Məsələ burasındadır ki, maşinist, qatarı siqnalla hərəkət etdirir, hərəkətçilər isə yolu tənzimləyir. Bu avtomobil yolu deyil ki, maşinist qatarı səhv istiqamətdə sürsün. Çox gülünc və düşüncəsiz faktlar ortaya qoyurlar. Sanki avtomobildir ki, maşinist qatardan düşüb soruşa: "Bura Siyəzəndir?”. Bir daha deyirəm, qatar siqnallar vasitəsilə idarə olunur və onun səhv istiqamətdə hərəkət etməsi mümkün deyil”.

Mətbuat katibi qurumun sədri Cavid Qurbanovun məsələyə münasibətindən də danışıb: "Cavid müəllimin məsələyə münasibəti çox pis oldu. O, təəssüf etdi ki, bu qədər gözəl görülən işə, çəkilən zəhmətə kimlərsə kölgə salmaq istəyir”.