Son zamanlar "Karvan” ticarət mərkəzində icarə haqqı qiymətlərinə dəyişiklik edildiyi haqqında xəbərlər yayılıb. Xəbərlərdə qeyd edilir ki, ticarət mərkəzində bir kvadrat metr yer üçün tələb olunan məbləğ 200 manatdır. Qiymətlərin birdən - birə fantastik məbləğdə bahalaşması üzündən artıq iş adamlarının ticarət mərkəzini tərk etdikləri də bildirilir. Xeberle.com olaraq "Karvan” ticarət mərkəzində bir neçə iş adamı ilə söhbət edib məlumatı dəqiqləşdirməyə çalışıdıq.
İlk öncə qeyd edək ki, iş adamlarının ticarət mərkəzini kütləvi şəkildə tərk etmələri barədə deyilənlərin doğru olmadığının şahidi olduq. Ticarət mərkəzində obyektləri qarış-qarış gəzdik. Bir neçə obyekt icarədarları ilə söhbət etdik. Bildirdilər ki, qiymətlərdə heç bir dəyişiklik yoxdur. İlin əvvəlində dollar bahalaşandan sonra, tam əksinə icarə qiyməti "Karvan" ticrət mərkəzinin rəhbərliyi tərəfindən ucuzlaşdırılıb. Onu da qeyd etdilər ki, ticarət mərkəzini icarədarların tərk etməsinin icarə qiyməti ilə heç bir əlaqəsi yoxdur. Heç kimə sirr deyil ki, dolların birdən-birə bahalaşması Sumqayıt şəhərinin bütün ticarət və iaşə obyektlərinin işinə çox böyük zərbə vurub. Təkcə "Karvan” ticarət mərkəzində deyil şəhərin hər yerində alverin çox zəif getdiyi söylənilir. Maliyyə böhranı sözügedən ticarət mərkəzindən də yan keçməyib. Hazırda "Karvan”da 16 kv/m obyektin aylıq icarə qiyməti 400 manat civarındadır.
 Xatırladaq ki, Sumqayıtın ən böyük ticarət mərkəzi sayılan "Karvan” ticarət mərkəzində  iki dəfə böyük yanğın baş verib. 2013-cü ildə tamamilə yanıb kül olan ticarət mərkəzində təmir bərpa işləri hələ də davam edir. Mərkəzdə təmir işlərinin nə zaman bitəcəyi hələ məlum deyil.
Aytən Əli, Xeberle.com