İqtisadi böhran şəraitində, manatın 2-ci devalvasiyasından sonra sumqayıtlı jurnalist Aida Eyvazlı maraqlı humanitar xarakterli təkliflə çıxış edib. Xeberle.com həmin təklifi təqdim edir.
Dünyanı başına götürən iqtisadi böhran, büdcələrin neft fondundan asılılığı insanların və vətəndaşların həyatına mənfi təsirsiz ötüşməyəcək. Mən inanıram ki, Azərbaycan Prezidenti İlham Əliyev də aztəminatlı ailələrin vəziyyətini nəzəərə alıb, qonşu ölkələrdə olduğu kimi aztəminatlı ailələrin bank borclarını indeksləşdirəcək. Lakin iş yerlərinin azlığı, bundan sonra da bir çox sahibkarların, idarələrin bağlanması təhlükəsi də bizdən yan ötməyəcək. Şəhərimiz əvvəllər fəhlə şəhəri adlansa da, insanlar firavan yaşayardılar. Çünki ən azı fəhlənin evinə çörək gətirməsi üçün iş yeri var idi. Bu ağır illərdə insanlarımızı bir-birinə mərhəmətli olmağa çağırıram. Dünyanın hər yerində beynəlxalq təşkilatlarda işləyən insanlar arasında maraqlı bir mübadilə var. Onlar ayda bir dəfə görüşərək, evlərində olan lazımsız paltar və əşyaları bir-birinin uşaqlarına verir, evlərindəki əşyalara dəyişirlər. Baxmayaraq ki, beynəlxalq təşkilatlarda işləyən insanların əməkhaqqı yüksəkdir, lakin israfçılıq etməsinlər deyə, bu imkandan bəhrələnirlər. Üzümü şəhərimizin bələdiyyəsinə, şəhər icra hakimiyyətinə tutaraq müraciət edirəm: insanlarımızı bir olmaq, mərhəmətli olmağa çağırmaq üçün belə paltar, əşya mübadiləsi etmək məqsədi ilə şəhərin bir neçə yerində mərkəz yaradılarsa, evində lazımsız paltarları, əşyaları olan sakinlərimiz gətirib paltarlarını, əşyalarını həmin mərkəzə verəcəklər. Və ehtiyacı olan insanlar isə heç bir ödəniş etmədən uşağına, özünə, evinə lazım olan hər şeyi oaradan götürüb gedə biləcək. Bu iqtisadi çətinliklər zamanı insanlara yenidən mərhəmətli olmaq hisslərini, qonşusuna yardım etmək vərdişlərini qaytara bilər!
Aida Eyvazlı
Xeberle.com