Hər dəfə burdan – 10-cu mikrorayonun 13-cü mikrorayonla üzbəüz tərəfindən keçəndə yadıma 1998-ci il düşür. Gördüyünüz bu yerdə Azərbaycan Xalq Cümhuriyyətinin yaranmasının 80 illiyi münasibətilə "Cümhuriyyət" parkı salınmalı idi. Bu isə 1998-ci ilə təsadüf edirdi. O park bizim qürur mənbəyimiz olacaqdı, o dövrün nənə-babaları nəvələrini gəzmək üçün buraya gətirəcəkdilər, o vaxtlar xatirlərinə gəlib fəxrlə bu parkın tarixçəsini nəvələrinə danışacaqdılar. Həm tariximiz yaşayacaqdı, həm böyüməkdə olan balalarımız tarixlərindən xəbərdar olacaqdı, həm də qoca nənə-babalarımızın xatirələrindəki xoş anlar onlara hər zaman yaşamaq ümidi verəcəkdi. Lakin heç nə gözlənilən kimi olmadı. AXC-nin şərəfinə salınacaq o park ideyası reallaşmadı.

İndi o parka gəzmək üçün gedəndə yerində şadlıq sarayları, hündürmərtəbəli binaları və mebel salonlarını görəndə "Dəli bir ağlamaq keçir könlümdən”...
Belə ki, park üçün ayrılmış ərazi sahibkarlara satıldı. Burada iki hündürmərtəbəli bina var ki, onun birində tikinti təxminən 2006-cı ildən dayandırılıb. Bu ərazidə həmçinin iki yanacaqdoldurma məntəqəsi də var. Həmin zamanlarda bu ərazinin Sosial Ədalət Partiyasının sədri, o vaxtkı millət vəkili Mətləb Mütəllimliyə məxsus olduğu bildirilirdi. Bu ərazini ona keçmiş icra başçısı Şakir Abuşov vermişdi. Məlumata görə, Vaqif Əliyev Sumqayıta icra başçısı təyin olunandan sonra bu sərəncamı ləğv etmişdi.
İnternetdə parkın inşa olunması ilə bağlı informasiya axtarırdım. Qarşıma belə bir informasiya "Qüdrət M. Daha bir istirahət zonası: Sumqayıt şəhərində inşasına başlanılan "Azərbaycan Xalq Cümhuriyyətinin 80 illiyi adına" park haqqında. Sumqayıt.-1998.-13 iyun.-s.2.” çıxdı. "Sumqayıt” qəzetində parkın inşası ilə bağlı yazı da yazılmışdı.

Həmin yazını olduğu kimi diqqətinizə çatdırırıq:

"Sumqayıtda «Azərbaycan Xalq Cümhuriyyətinin 80 illiyi adına Park» salınır

Azərbaycan Respublikasının Prezidenti, dünyaşöhrətli siyasi xadim Heydər Əliyev 1996-cı ilin iyununda Üzeyir Hacıbəyov adına «Kimyaçılar» sarayında «Sumqayıt indi bir yaşıl şəhər, demək olar ki, parklar şəhəridir” - deməsini yəqin ki, sumqayıtlılar yaxşı xatırlayırlar. Bu, həqiqətən də belədir. Yayın qızmar günlərində Xəzərin sahilində şəhər boyu uzanan parkda istirahət edərkən ayrı-ayrı küçə və xiyabanlardakı, yaşayış massivlərindəki yaşıl çətirli ağacların kölgəsində dincələrkən adam rahatlıq tapır, sərinləşir. O da yaxşıdır ki, şəhərimizdə park və xiyabanlara qayğı bir an olsun unudulmur, mövcud yaşıllıqlar qorunub saxlanılmaqla yanaşı, yeni-yeni istirahət guşələri yaradılıb sumqayıtlıların istifadəsinə verilir.
Son bir ildə şəhərin ən böyük mikrorayonlarından olan 9-cu mikrorayonda «Lüdviqshafen parkı»nın salınması, həmin mikrorayonla 6-cı mikrorayon arasındakı geniş ərazidə gözəl istirahət zonasının təşkili dediklərimizə əyani sübutdur.
Bir ay əvvəl xalqımızın qeyrətli oğlu, el ağsaqqalı Heydər Əliyevin anadan olmasının 75 illiyi günlərində açılışı olan «Heydər bağı» parkı getdikcə öz görkəmini dəyişir. Burada yeni-yeni əyləncə qurğuları, istirahət guşələri yaradılır. Parkda istifadəyə verilmiş yay estradasında tez-tez maraqlı konsertlər keçirilir. Burada quraşdırılmış karusel dodağı süd qoxulu balalarımıza bol-bol sevinc bəxş edir. Parkda açıq havada təşkil edilmiş iaşə obyektlərində sərin dondurma yemək, bir stəkan pürrəngi çay içmək, şəkil çəkdirmək nə qədər də xoşdur.
Mayın 28-də «Heydər bağı» parkı daha izdihamlı idi. Azərbaycan Xalq Cümhuriyyətinin 80 illiyi münasibətilə burada bayram şənliyi keçirildi, gəzintilər oldu. Elə həmin gün şəhər icra hakimiyyəti başçısının təşəbbüsü ilə daha bir yaşıl xiyabanın - parkın inşasına başlanıldı. 10-cu mikrorayonla 13-cü mikrorayon arasındakı geniş ərazidə uzanacaq həmin park «Azərbaycan Xalq Cümhuriyyətinin 80 illiyi» adını daşıyacaqdır. Gələn il milli istiqlalımızın 81-ci ildönümü bu parkda bayram ediləcək, daha doğrusu həmin gün parkın təntənəli açılışı olacaqdır.
Bütün sumqayıtlılar, ilk növbədə həmin ərazidə yaşayanlar bu xəbəri razılıqla qarşılamış, adamlara göstərilən diqqət və qayğının bariz nümunəsi kimi qiymətləndirmişlər.
10-cu mikrorayonda yaşayan İbrahim Hümbətov demişdir:
- Yaşadığın mənzilin, küçənin, məhəllənin, şəhərin abadlığı, təmizliyi, səliqə-səhmanlı olması, estetik baxımdan göz oxşaması olduqca böyük əhəmiyyət kəsb edir. Adamda ruh yüksəkliyi, daxili sevinc və iftixar hissi yaradır. Ən başlıcası isə sağlamlığa müsbət təsir göstərir, adamların iş qabiliyyətini çoxaldır. Evimizin ərazisində belə bir parkın salınması da bu baxımdan əhəmiyyətlidir və bizi sevindirir.

Qiyas Orucov (10-cu mikrorayon,ev 1,mənzil 23):

- Mikrorayonumuzun yaxınlığında yeni parkın salınacağı sevinclə qarşılamışam. Mən müəlliməm. Yaxşı bilirəm ki, yaşayış massivlərində nə qədər çox istirahət yerləri, parklar, xiyabanlar olarsa, uşaqların və yeniyetmələrin tərbiyəsi daha asan olar. Binaların giriş qapısına toplaşan, şəhərdə boş-boş veyillənən yeniyetmələr parkda istirahət edər, müxtəlif əyləncələrlə, stolüstü idman oyunları ilə günlərini şən keçirərlər. Nəticədə isə onlar pis əməllərlə, cəmiyyətə zidd işlərlə məşğul olmazlar.
Yaşıllıqlar qoynunda açıq havada istirahət etməyi nənələr və babalar daha çox xoşlayırlar. Mən də babayam. Dərin qürur hissi keçirirəm ki, «Azərbaycan Xalq Cümhuriyyətinin 80 illiyi» adını daşıyacaq parkın açılışında nəvələrimin əlindən tutaraq iştirak edəcəyəm.

13-cü mikrorayondakı N.Gəncəvi adına uşaq kitabxana klubunun müdiri Zərnigar Babayeva sevincini belə izah etdi:

- Biz hər gün uşaqlarla işləyirik. Onlara təkcə kitabxanada xidmət göstərmir, çalışırıq ki, uşaqlar üçün müxtəlif tədbirlər, əyləncəli görüşlər, yaradıcılıq gecələri keçirək. Etiraf edim ki, bunun üçün imkanımız olduqca məhduddur. Elə tədbir vardır ki, onu burada keçirmək çətindir. Bu baxımdan, kitabxana-klubumuzla üzbəüz geniş bir ərazidə park salınacağını eşidəndə daxili bir rahatlıq tapdım. Deməli, çox keçməyəcək ki, biz uşaqlarla birlikdə parkda gəzintiyə çıxacaq, açıq havada müxtəlif tədbirlər keçirəcək, hətta oxucu konfransları təşkil edəcəyik. Bunu ona görə deyirəm ki, yəqin yeni salınacaq parkda müəyyən mədəniyyət obyektləri də olacaqdır. Biz o günü səbirsizliklə gözləyirik.

Tofiq Sadıqov (13-cü mikrorayon,ev19,mənzil 51):

- Hələ orta məktəbdə oxuyuram. Yaxınlıqda «Heydər bağı» parkının salınması məni və şagird dostlarımı sevindirmişdir. Gərgin təhsil günündən sonra açıq havada olmaq, boş vaxt keçirmək bizim üçün olduqca əhəmiyyətlidir. Bunun üçün ərazidə parkların, bağların, istirahət zonalarının olması vacibdir.
Mikrorayonun ərazisində daha bir istirahət parkının salınacağı xəbərini toy-bayramla qarşılamışıq. İnanırıq ki, inşaatçı əmilər, quraşdırıcı dayılar bu xeyirxah işi uğurla başa çatdıracaqlar. Şəhərimizdə «Heydər bağı», «Lüdviqshafen» kimi parklarla yanaşı, «Azərbaycan Xalq Cümhuriyyətinin 80 illiyi adına park» da olacaqdır.”

"Sumqayıt” qəzetində bununla bağlı daha bir yazıya 6 iyun 1998-ci il tarixində rast gəlinir. Bu yazıda da Sumqayıtda Cümhuriyyət parkının salınacağından bəhs edilir.

Bu gün Azərbaycan Xalq Cümhuriyyətinin yaranmasının 98-ci ildönümü qeyd olunur. Sözügedən park hələ də salınmayıb. Ərazi kifayət qədər böyükdür. Bu ərazidə kimlərinsə nəfsi, tamahkarlığı, biznes maraqları ucbatından adıçəkilən park salınmadı. Amma yenə də gec deyil. Park salınmasa da, kiçik bir xatirə guşəsi, abidəsi salmaq olar. Bunun üçün kifayət qədər yer də var. Sadəcə istək və iradə lazımdır. Hər halda ümidvarıq ki, bu köhnə, lakin vacib məqamı şəhər rəhbərliyi də saf çürük edər. Bildiyimizə görə, Zakir Fərəcov Sumqayıtda park və xiyabanların çox olmasının tərəfdarıdır.
Ramil Zeynallı
Xeberle.com