Fevralın 5-də SOCAR beynəlxalq seçim müsabiqəsi nəticəsində "Maire Tecnimont” şirkəti ilə yeni Yüksək Sıxlıqlı Polietilen (YSPE) zavodu layihəsinin həyata keçirilməsi çərçivəsində mühəndislik, təchizat və tikinti üzrə sabit qiymətli müqavilə imzalayıb. Sənədi SOCAR-ın prezidenti Rövnəq Abdullayev və "Maire Tecnimont” şirkətinin İdarə Heyətinin sədri Fabritsio di Amato imzalayıblar.
AZƏRTAC xəbər verir ki, imzalanma mərasimdən öncə keçirilən görüşdə Bakıdan 30 kilometr aralıda, Sumqayıt Kimya Sənaye Parkının ərazisində inşa ediləcək zavodun Azərbaycanın neft-kimya sənayesinin yeni mərhələyə qədəm qoyduğunu nümayiş etdirdiyi qeyd edilib. Bildirilib ki, müqaviləyə əsasən layihənin istismara verilməsinə qədər olan mühəndislik xidmətlərinin həyata keçirilməsi, avadanlıq və mal-materialların satın alınması, quraşdırılması və tikinti işləri "Maire Tecnimont” şirkəti tərəfindən həyata keçiriləcək. Zavodun "Ineos Innovene S” texnologiyası əsasında hər il 120 min ton həcmində məhsul istehsal etməsi nəzərdə tutulur. Layihənin maliyyələşdirilməsini "Qazprombank” həyata keçirir.
Məlumat verilib ki, 2015-ci ilin aprel ayında "Maire Tecnimont” şirkətinin SOCAR tərəfindən YSPE layihəsi üzrə tenderin qalibi elan olunması və mühəndislik, təchizat və tikinti üzrə sabit qiymətli müqavilənin imzalanması "Maire Tecnimont” Qrupuna bəslənilən etimadın və verilən yüksək qiymətin təzahürüdür. "Maire Tecnimont” şirkətinin Baş İcraçı direktoru Pierroberto Folgiero bu etimadı qrupun polyolefin sənayesində mühəndislik, tikinti sahəsi üzrə yüksək rəqabət qabiliyyətinə göstərilən etimad kimi dəyərləndirib.