Onlar sizə də yaxınlaşacaq

Ayrı-ayrı adlar altında müxtəlif yolla pul yığanlara rast gəlmişik.

Tofiq Adıgözəlov adlı Sumqayıt sakini Xeberle.com-a bildirib ki, bir müddətdir ki, bir nəfər Sumqayıtda pul qopartmağın yeni formasını tapıb: "Şəhərin 12-ci mikrorayon hissəsində təxminən 35-40 yaşlarında hündürboy bir kişi ərazidə olan obyektlərə girərək hamıdan benzin pulu istəyir. O, pul ala bilmədikdə isə başqa varianta əl atır. Tanınmış insanlardan birinin adını çəkir, qohumu olduğunu deyir və bu yolla qarşısındakından pul almağa çalışır. Bu da alınmadıqda isə cibindən 10 manat çıxarıb xırdalamağınızı istəyir. Xırda olmadıqda sizdən 5 manat pul istəyir və deyir ki, taksiyə verəcək. Bunun əvəzində isə telefon nömrəsini sizə bildirir. Artıq bu hal neçənci dəfədir ki, təkrarlanır.”

T. Adıgözəlov onu da bildirib ki, ötən gün həmin insan onu da aldatmaq istəsə də, hiylə baş tutmayıb: "Dünən həmin şəxs mənim obyektimə təkrar daxil oldu. Bu dəfə isə hiyləsi baş tutmadı. Ona yaxınlaşmaq istəyəndə qaçaraq ərazidən uzaqlaşdı. Ətrafda olan obyekt sahibləri də bildirdilər ki, həmin şəxs onlardan da pul istəyib. Hər kəs bilsin, həmin şəxs həmişə özünü telefonla danışırmış kimi göstərərək obyektlərə daxil olur. Ehtiyatlı olun, bu fırıldaqçının qurbanına siz də çevrilə bilərsiniz.”
Hər halda, Sumqayıt sakinlərini diqqətli olmağa, aldanmamağa çağırırıq. Ancaq istənilən halda belə şəxslər müvafiq qurumların nəzarətinə götürülməlidir- çünki belələri pul yığmaq imkanları tükənəndə ehtiyyat variantlara- oğurluğa, dələduzluğa və s. keçirlər.