Sumqayıtda şadlıq evlərinin sayı o qədərdir ki, artıq şəhərin harasında isə obyekt tikiləndə sakinlər ilk olaraq "Ya şadlıq evidir, ya da ki, supermarket” – deyə düşünürlər. Əslində, şəhər sakinlərinin dəfələrlə sonda özünü doğruldan bu ehtimallarını təbii saymaq olar. Çünki Sumqayıt şəhərində son bir ili - iqtisadi böhran dövrünü nəzərə almasaq, axır vaxtlar tikilən obyektlərin böyük əksəriyyətini şadlıq evləri təşkil edir.

"Şadlıq sarayları mikrorayonu”
 Hazırda şəhərimizdə təxminən 30–dan çox şadlıq evi var. Şadlıq saraylarının sayı artıqca, menyu və icarə qiymətləri də işıq sürəti ilə artır. Rəqabət o qədər güclənib ki, artıq son illər tikilən şadlıq saraylarının daha çox fərqli üslubda, görkəmdə olmasına və sahəsinin böyüklüyünə xüsusi diqqət edilir. Eyni ərazidə böyük bir şadlıq sarayı varsa, onun yaxınlığında ondan daha da böyüyü tikilir. Çox təəssüf ediləcək haldır ki, obyektlərin böyük əksəriyyəti yol kənarında və yaşayış binalarının yaxınlığında inşa edilir.

Təkcə 17-ci mikrorayon ərazisində 9 adda ("Büllur”, "Tural”, "Xarı Bülbül”, "Gold Palace”, "Dan Ulduzu”, "Şahanə”, "Qubadlı”, "Nur”) bir–birinə az qala bitişik vəziyyətdə olan şadlıq evləri var. Hətat bu ərazidə ilk şadlıq evi tikilməyə başlayanda təbii olaraq sakinlər narazılıq etmişdilər, amma aidiyyəti qurumlara edilən şikayətlər cavabsız qaldıqdan sonra sakinlərin susmaqdan başqa çarəsi qalmamışdı. Çünki o sözügedən mikrorayonun həmin hissəsi - daha dəqiq desək yaşayış binalarının qarşısı şadlıq evlərinin tikintisi üçün heç bir qaydada uyğun deyil. Olan oldu, tikilən tikildi. Artıq 17-ci mikrorayonu cəsarətlə "Şadlıq sarayları mikrorayonu” adlandırmaq olar.
Lakin, ən ciddi məsələ ortaya çıxdı. O şadlıq evlərində toylar zamanı ətrafa yayılan kabab və ocaq qoxusu, ekologiyaya zərbə vuran zəhərli tüstü... Məhz bunun çarəsi hələ də tapılmır. Dəfələrlə Sumqayıt sakinləri əlaqədar qurumlara şikayətlər etsələr də, problem həllini tapmayıb. Xeberle.com olaraq bu haqda bir neçə dəfə tənqidi xarakterli materiallar təqdim etmişik, lakin problem hələ də qalmaqdadır. Problemin həlli isə çox sadədir, sadəcə sakinlərin narahatlığı, ekologiyanın pozulması bahasına pullar qazanan şadlıq evi sahibləri xərcə düşməlidirlər, çox yox, bir az...
Şadlıq saraylarında tüstünün, qoxunun ətrafa yayılmasının qarşısı xüsusi filtr vasitəsilə alınmalıdır. Sadə bir işdir. Amma...

Bəs, görəsən, Sumqayıtın ekologiyasını, sakinlərin rahatlığını, sakitliyini öz bizneslərinə qurban verən obyekt sahibləri ziyafət günlərində kabab qoxusunun, manqal tüstüsünün atmosferə, evlərə yayılmaması üçün hansısa tədbirlər görürlərmi? Adıçəkilən problemlə bağlı Sumqayıt TV-nin xüsusi reportajını təqdim edirik...
Xeberle.com
P.S. Ümidvarıq ki, şəhər rəhbərliyi sumqayıtlıların şikayətlərini nəzərə alaraq bunla bağlı ciddi tədbirlər görəcək.