Son vaxtlar Sumqayıtda şəhərdaxili nəqliyyat sisteminin təkmilləşdirilməsi sahəsində qərarlar qəbul edilir, müvafiq işlər görülür. Hətta bu məqsədlə Sumqayıta yeni avtobus və taksilər gətirilsə, nəqliyyat vasitələrinin təqdimatı keçirilsə də, hələlik bu yeni avtobuslar xəttə buraxılmayıb. Eyni zamanda şəhərdə fəaliyyət göstərən marşrut avtobuslarının böyük əksəriyyəti müasir dövrün tələblərinə cavab vermir. Elə bəzi avtobus dayanacaqları kimi...
Təqdim etdiyimiz bu foto Sumqayıt şəhər 11-ci mikrorayon ərazisindəndir. Azacıq yağış yağan kimi dayanacağın ətrafı su gölməçəsinə dönür, palçıq olur. Bu da sərnişinlərin dayanacaqdan rahat istifadə etməsinə maneçilik törədir. Dayanacağın quraşdırıldığı yolda avtomobillərin hərəkət sürətini də nəzərə alsaq, bu həm də sərnişinlərin təhlükəsizliyi baxımından narahatlıq doğurmaya bilməz.

Görünən odur ki, dayanacağın qurlaşdırılması zamanı sanki sərnişinlər nəzərə alınmayıb və ya diqqətsizlik edilib. Bunu təqdim etdiyimiz şəkillərdə aydın görmək olar. Bir sözlə, qarlı-yağışlı günlərdə bu dayanacaq sərnişinlərə xidmət göstərmir. Əslində heç günəşli günlərdə də bu dayanacaqlar sərnişinlər üçün rahat deyil. Nə küləkdən qoruyur, nə yağışdan, nə istidən...
Qeyd edək ki, bu prospekt Sumqayıt şəhərində tez-tez piyadaların vurulması ilə bağlı nəqliyyat hadisələri baş verən yollardan biridir. Burada təcili piyada keçidinə də ehtiyac var. (yenisumqayit.az)
Şəhərimizin digər yerlərində də bu cür bərbad dayanacaqlar mövcuddur. Onların bir qisminin şüşələri sındırılaraq yararsız vəziyyətə salınıb. Bəzi dayanacaqların yerində qoyulmaması da diqqət çəkir. Məsələn, Nəriman Nərimanov küçəsi ilə Sülh küçəsinin kəsişməsində işıqforda illərdir qurulan dayanacaq yerində deyil. Bu dayanacağın qarşısı daim avtobuslarla dolu olur və nəticədə nəqliyyat sisteminin normal fəaliyyəti üçün ciddi əngəl törədir.
Yaxşı olardı ki, həmin dayanacaq təxminən 15-20 metr arxaya çəkilsin. Yolun əks tərəfində, həmçinin 9-cu mikrorayon Üzeyir Hacıbəyov küçəsinin Şərq bazarı hissəsində bu praktika həyata keçirilsə də, niyəsə bu dayanacaq unudulub. Dəfələrlə bu barədə narazılıq şəhər Nəqliyyat Departamentinə bildirilsə də, problem hələ də açıq qalır. Sumqayıtda elə yerlər var ki, marşrut avtobusları üçün qanunsuz şəkildə "dayanacağa” çevrilib.
Məsələn, Nəriman Nərimanov küçəsinin başlanğıcı, 5-ci mkr ərazisində avtobuslar qanunsuz şəkildə gül dükanın qarşısında saxlayaraq həm nəqliyyatın, həm də piyadaların hərəkətinə ciddi əngəl törədirlər. Onlar eyni zamanda sakinlərin həyatını təhlükə altında da qoyurlar. Belə ki, bir neçə dəfə bu ərazidə az qala ölümlə sonuclanacaq qəza hadisəsi baş verib. Amma qarşıda bir neçə metr aralıda qoyulan dayanacaq isə sonuncu sərnişinini haçan gördüyünü bəlkə də "yaddan çıxarıb”.

















Daha bir problem 13-cü mikrorayonla 6-cı mikrorayon dairəsindədir. Yeni tikilən xalça dükanın qarşısında SSRİ dönəmində dayanacaq olsa da, uzun illərdir ki, sakinlər burada dayanacağın olduğunu xatırlamırlar. Amma yayın istisində, qışın soyuğunda, qar və yağışda sumqayıtlılar məhz həmin dayanacaqsız nöqtədə avtobus gözləyirlər. Burada dayanacaq qoyulsa, sakinlər müvafiq qurumların canına dua edərdilər.

















Sumqayıtın 17-ci mikrorayon sakinləri dayanacaq problemindən əziyyət çəkir. Ümumiyyətlə mikrorayonun dörd bir tərəfində bir dənə də olsun dayanacaq yoxdur. Əsasən də restoranların qarşısında. "İrəvan” restoranından başlamış "Səda” marketə qədər olan hissədə- nə yolun 16-cı mikrorayona olan tərəfində, nə də ki, 17-ci mikrorayon olan ərazidə dayanacaq quraşdırılmayıb.

Sakinlər yağış yağanda ağacların altında, maşınların yanında, marketlerin kənarına söykənirlər. Sakinlər bir neçə dəfə bunla bağlı şikayət də etmişdilər. Hələlik bu qədər. Təəssüf ki, bir yazıda Sumqayıtdakı dayanacaq probleminin hər biri haqqında ayrıca söhbət açmaq çətindir. Amma ümid edirik ki, şəhərimizin aidiyyəti qurumları tezliklə bu problemləri də aradan qaldıracaq. Bunun üçün elə də böyük maliyyə vəsaiti tələb olunmur.
Sadəcə azacıq diqqət və operativlik.
Elnur Ağayev
Xeberle.com