Bəzən hansısa problemimizin tez bir zamanda həll olunmasını istəyirik. Daha doğrusu, elə suallar, yaxud problemlər yaranır ki, bunların həlli operativlik tələb edir. Son illər dövlət orqanlarında "qaynar xət”lərin yaradılması da bu məqsədi güdür. Məhz bu "xətlər” vasitəsilə vətəndaşlar istədikləri suallara telefondaca cavab alır, yaxud problemlərinin həll edilməsini bu xidmət vasitəsilə gerçəkləşdirir. Həmin qurumlar mütəmadi olaraq əlaqə telefonlarını vətəndaşların diqqətinə çatdırır və bildirilir ki, istənilən şəxs həmin xidmətə müraciət edərək problemlərinin həllinə nail ola bilərlər.
Əksər dövlət orqanlarında olduğu kimi  Sumqayıt şəhər İcra Hakimiyyətinin də 164 nömrəli "Qaynar xətt”i var. Şəhər icra hakimiyyətinin sumqayit-ih.gov.az ünvanlı internet səhifəsində məlumat da yerləşdirib. Sumqayıtın bir neçə yerində icra hakimiyyətində belə bir xidmətin fəaliyyət göstərməsiylə bağlı reklam lövhələrinə də rast gəlmək olar.
Görəsən Sumqayıt şəhər icra  hakimiyyətinin "Qaynar xətt”inə hansı məsələlərlə bağlı müraciətlər olur?
Elə bu məqsədlə Sumqayıt şəhər icra hakimiyyəti ilə əlaqə saxladıq. İcra hakimiyyətindən Xeberle.com-a  bildirdilər ki, "Qaynar xətt” 24 saat Sumqayıt sakinlərinin ixtiyarındadır. Qurumdan dedilər ki, "Qaynar xətt” xidmətinə gün ərzində orta hesabla 10-15 arası müraciətlər daxil olur ki, bu müraciətlər də müxtəlif məzmunlu olur. Vətəndaşları narahat edən əsasən kommunal problemlərdir: "Havaların soyuq keçməsi ilə bağlı bəzi sahələrdə yaranan problemlər sakinləri narahat edir. Bu narahatçılıq edilən müraciətlərdə də öz əksini tapır. Belə ki, gün ərzində "Qaynar xətt” xidmətinə edilən zənglərin əksəriyyəti kommunal məsələlərlə - istilik sistemi və təbii qazla bağlı olur.Bununla yanaşı, edilən müraciətlər sırasında bəzi yaşayış binalarının dam örtüklərinin yararsız olması da yer alır. Şəhər sakinlərini narahat edən problemlər arasında sahibsiz itlər məsələsi də var. Eyni zamanda bağçalarda olan çatışmazlıqlar barəsində də müraciətlər olur. Sakinlər tərəfindən bütün edilən müraciətlər hər gün toplanır və icra başçısına məlumat verilir. Şəhər rəhbəri şəxsən bu məsələni xüsusi diqqətdə saxlayır. Daxil olan müraciətlər təhlil edilir, icra hakimiyyətinin səlahiyyətlərinə aid olan məsələlər operativ şəkildə həll olunur. İcra hakimiyyətinin səlahiyyətində olmayan məsələlər isə aidiyyatı qurumlara yönəldilir və həlli diqqətdə saxlanılır.” 
R.Zeynallı
Xeberle.com