Xəbər verdiyimiz kimi, "Azərikimya” İstehsalat Birliyində kütləvi informasiya vasitələrinin nümayəndələri ilə Sumqayıt şəhərində son dövrlərdə aparılan abadlıq-quruculuq işləri, həyata keçirilən layihələrin müzakirəsinə həsr olunmuş görüş-diskussiya keçirilib. Görüşdə şəhərdə aparılan abadlıq-quruculuq işlərinə toxunulub, eləcə də görülməsi nəzərdə tutulan işlər barədə fikir mübadiləsi aparılıb.
Xarici şəhərlərdə olan praktikanın doğma Sumqayıtımızda da tətbiqindən söz açan Muxtar Babayev şəhərin təmiz saxlanılması üçün də ideyaların verilməsinin vacibliyini vurğuladı.
Görüşdə iştirak edən Xeberle.com saytının təsisçisi Kamal Almuradlı bu yaxınlarda sayt əməkdaşlarının Türkiyənin İzmir şəhərində səfərdə olduğundan danışıb. K. Almuradlı bildirib ki, İzmirin plastik su qabları ilə çirkləndiyini nəzərə alaraq bələdiyyə çox maraqlı bir addım atıb:
"Belə ki, butulka formasında iri zibil qabları düzəldilib. İnsanların ən sıx olduqları yerlərdə: keçidlər, ticarət mərkəzlərinin yanı, dayanacaqlarda və s. quraşdırılıb. Bu həm şəhərin təmiz saxlanmasına həm də bələdiyyənin az da olsa plastik qablardan gəlir əldə etməsinə xeyirdir. Bu addımla ekologiyaya və ətraf mühitə də xeyli fayda vermiş olarıq. Belə ki, 1 plastik qabın təbiətdə əriyib yox olması üçün təxminən min il tələb olunur. Elə isə, biz asanlıqla Sumqayıtda bu problemi aradan qaldıra bilərik."
Təqdirəlayiqdir ki, təklifə müsbət yanaşan millət vəkili Muxtar Babayev bu formada olan qabların hazırlanmasını öz üzərinə götürüb və yer ayrılması məsələsini də aidiyyəti qurumlara çatdırılacağını bildirib.
Xeberle.com olaraq Sumqayıtımız naminə şəhər rəhbərliyindən bu ideyanın gerçəkləşdirilməsi üçün dəstək istəyirik.
Xeberle.com
Xəbərdən istifadə edərkən istinad etmək vacibdir.
