Bacardığımız qədər saytımızın poçt ünvanına gələn şikayət və təklifləri işıqlandırmağa çalışırıq. Onlardan biri də bu günlərdə Sumqayıt şəhər sakini Araz Mirzə oğlu Hüseynov tərəfindən şikayət məktubudur. Araz Hüseynov vaxtilə çalışdığı "Qibiskus” MMC-dən şikayətçidir. 22 yaşlı gəncin sözlərinə görə, o, 2014-cü ilin iyul ayının 27-si həmin firmaya işə qəbul olunub. Cari ilin aprel ayının 8-də isə öz imzası ilə işdən çıxıb. Arazın sözlərinə görə, şirkət onu aldadıb: ""Qibiskus” MMC ilə aralarında bağladıqları müqavilədə 250 manat maaş göstərilib. Halbuki şirkət ona çalışdığı 21 ay ərzində hər ay 80 manat kəsərək 170 manat əməkhaqqı ödəyib. Mən indi mənim o 80 manatları geri istəyirəm. Üstəlik, işdən çıxanda 250 manat yekun əməkhaqqımın əvəzinə 98 manat verildi. Beləliklə, həmin pulları üst-üstə toplasaq 1830 manat edir. Mən indi bu şirkətdən öz haqqımı, məvacibimdən kəsdikləri halal 1830 manat pulumu tələb edirəm”.

 

Arazın sözlərinə görə Sumqayıtda Hacı Zeynalabdin Tağıyev qəsəbəsi, Xəzri yaşayış massivində fəaliyyət göstərən "Qibiskus” MMC mebel, taxt döşəkləri istehsal edilir. Müəssisənin rəhbəri Aydın adlı şəxsdir. O, Sumqayıtda olmur, əsasən Bakıdakı ofisdə oturur. Amma onun müəssiyə təyin etdiyi rəhbər Fariz adlı şəxsdir. Məhz adıçəkilən şəxs onu təhdid edib, hədə qorxu-gəlib: "Fariz müəllimlə söhbətim oldu, öz haqqımı, halal pulumu tələb etdim. O isə mənə hədə-qorxu gəldi. Dedi ki, sənin həyatından xəbərdarıq, bilirik ki, sən narkomansan. Prokurorluq, vergi, əmək müfəttişliyi mənim arxamdadır. Mənim gücüm və pulum var. Gəl xoşluqla halallaşaq. Yoxsa qonşular var ki, üzünə duracaqlar ki, sən nəşə çəkirsən""

Arazın sözlərinə görə, o normal qaydada işləyib, vəzifə öhdəliklərini yerinə yetirib. Lakin maaşından kəsdiyi pulları qaytarmaq istəmədikləri üçün onu şantaj edərək narkoman adlandırırlar. Halbuki o, heç vaxt narkotikadan istifadə etmədiyini iddia edib.

Məsələ ilə bağlı "Qibiskus” Məhdud Məsuliyyətli Cəmiyyətlə (MMC) əlaqə saxladıq. Şirkətin rəhbəri olduğu deyilən Fariz adlı şəxslə danışa bilməsək də, suallarımıza cavab verən tapıldı. "Qibiskus”un baş mühasibi Vüsal Süleymanov məsələyə belə aydınlıq gətirdi: "O, 207 əməkhaqqı alıb. Bu məbləğdə banka köçürülüb. Bildiyiniz kimi, 250 manatdan Dövlət Sosial Müdafiə Fonduna ayırmalar tutulandan sonra əməkdaşın əmək haqqısı 207 manat 50 qəpik qalıb.”

Şikayətçinin iddiasına əsasən onun hesabına 170 manat köçürüldüyünü müəssisənin baş mühasibinə bildirdikdə isə o məsələni belə əsaslandırdı: "170 manat köçürülmə əməkdaşın yarım ay işlədiyi vaxt, məzuniyyətə çıxdığı vaxt olub. Məhz ona görə də bu məbləğdə vəsait işçiyə ödənilib. Qalan vaxtlarda isə 207 manat köçürülüb. Hazırda Araz Hüseynov hüquq-mühafizə orqanlarına da müraciət edib. Araşdırmalar aparılır. Eyni zamanda biz də onun barəsində şər-böhtan atdığına görə müvafiq orqanlara müraciət etmişik. Bir məsələni də diqqətinizə çatdırım ki, işçi qanunvericiliyin tələbələrinə uyğun olaraq işə qəbul olunub. Əmək müqaviləsi bağlanılıb və vaxtı çatanda müqaviləyə xitam verilib.

A.Hüseynovun müəssisə rəhbəri tərəfindən təhdid olunduğu ilə bağlı sualla bağlı baş mühasib bildirdi ki, işçinin söylədiyi fikirlər əsassızdır. Baş mühasib A.Hüseynovun intizamsız işçi olduğu ilə bağlı faktların olduğunu da dedi: "Bu insan müəssisədə çalışan müxtəlif insanlarla dava edib. Lazım gələrsə, onun hansısa arzuolunmaz işlərlə məşğul olduğunu sübut edə bilərik. Bununla bağlı bizdə dəlillər də var. Bu yaxınlarda siz bunun şahidi olacaqsınız.”

Araz bütün bu dediklərinin dəlil-sübutu kimi bizə sabiq müdiri Fariz adlı şəxslə olan dialoqunun kadrlarını da təqdim edib. Həmin kadrlara hansısa şərh verməkdən uzağıq...

Ümidvarıq ki,aidiyyəti orqanlar məsələ ilə bağlı müvafiq addımlar atacaq.

Xeberle.com

 

 

 

 

 

 

Xəbərdən istifadə edərkən istinad etmək vacibdir.