Sumqayıtda əksər orta məktəblərdə şagirdlərin çoxluğundan otaq çatışmır. Hətta bəzi siniflərdə şagirdlərin sayı 45 nəfərə yaxındır. Bu isə müəllimin keyfiyyətli dərs keçməsinə mane olur.
Sumqayıt Şəhər Təhsil Şöbəsinin müdir müavini Firidun Həmzəyev də bəzi məktəblərdə şagird sıxlığının olduğunu təsdiqləyir. Müdir müavini Xeberle.com-a açıqlamasında bidlirib ki,sıxlığın yaranmasının əsas səbəbini valideynlərdə görür. Belə ki, valideynlər uşağın sağlamlığını fikirləşmək əvəzinə müəllimin peşəkar olmağını əsas tutaraq uşaqları belə təhsil mərkəzlərinə göndərir: "Bir sıra çətinliklərimiz valideynlərin istək və arzularını yerinə yetirməkdən yaranır ki, bəzi valideynlər istəyir ki, ancaq uşağı bu məktəbdə oxusun. Bu məktəbdən əlavə bu müəllimənin, bu müəllimin sinifində oxusun. Bu da əlavə bizə çətinliklər törədir. Həmin sinifdə, həmin məktəbdə şagird sayı kəskin artır. Həmin müəllimin sinfində uşaqlarını oxutdurmaq istəyən valideynlərin təkidi ilə sinif sayı artır. 30-35, hətta bizim məktəblər var ki, 40-dən yuxarı şagirdi bir sinifdə komplektləşdirmişik.”
Onun sözlərinə görə,Sumqayıt məktəblərində ibtidai siniflərdə yaranan şagird sıxlığının aradan qaldırılması üçün bir sıra tədbirlər də həyata keçirilir: "Yaxın günlərdə çox güman ki, biz həmin sıxlığı azaldacağıq. Yeni siniflərin açılmasıyla əlaqədar olaraq bunun üzərində iş gedir. Bu dərs ilində 2500 artım şagirdə uyğun olaraq 60-70 sinifin açılması nəzərdə tutulub.”
R. Zeynallı
Xeberle.com
Xəbərdən istifadə edərkən istinad etmək vacibdir.
