Sumqayıtda Xeberle.com saytı ("Xəbərlə” MMC) və "168 saat” qəzetinin təşkilatçılığı, Beynəlxalq Miqrasiya Təşkilatının maliyyə dəstəyi ilə "Sumqayıt şəhəri və yaxın regionlarda insan alverinə qarşı mübarizə sahəsində ictimai dəstəyin gücləndirilməsinə yönəlmiş tədbirlər” layihəsinin təqdimat mərasimi keçirilib.
Tədbirdə KİV təmsilçiləri, şəhərin aktiv gəncləri, habelə digər ictimaiyyət nümayəndələri iştirak ediblər.
Təqdimat mərasimini giriş sözü ilə açan Xeberle.com saytının redaktoru, layihənin rəhbəri Ramil Zeynallı ilk növbədə layihənin məramı haqqında iştirakçılara ətraflı məlumat verib. O, bildirib ki, layihənin əsas məqsədi insan alveri və məcburi əmək qurbanlarını və potensial qurbanları maarifləndirmək, Sumqayıt şəhərində və regionda insan alveri ilə bağlı məlumatları toplamaq, araşdırmaq, nəticələr barədə məlumatlar dərc etmək, insan alverinə qarşı mübarizə sahəsində KİV-lərlə mərkəzi və yerli dövlət orqanları, bələdiyyələr arasında əməkdaşlığı inkişaf etdirmək, eləcə də jurnalistlərin yeni bilik və bacarıqlara yiyələnməsinə nail olmaqdır. R.Zeynallı qeyd edib ki, layihə çərçivəsində regionlarda fəaliyyət göstərən KİV nümayəndələrinin iştrakı ilə ictimai dinləmələr təşkil ediləcək. Layihə rəhbəri vurğulayıb ki, bu dinləmələr insan alveri sahəsində jurnalist fəaliyyətlərini araşdırmaq, media mənsublarının bu sahədə çalışmasına maneələr yaradan faktiki və ya hüquqi halları araşdırmaqdan ibarət olacaq.
Layihənin tərəfdaşı "168 saat” qəzetinin baş redaktoru Vüsal Məmmədov isə çıxışında jurnalistlər üçün təlimlərin keçiriləcəyini tədbir iştirakçılarının diqqətinə çatdırıb. V.Məmmədov qeyd edib ki, jurnalistlər üçün nəzərdə tutulan təlimlərdə ekspert kimi hüquqşunas, psixoloq və araşdırma aparmaq sahəsində təcrübəyə malik jurnalist cəlb ediləcək. O, həmçinin qeyd edib ki, layihə çərçivəsində mövzuyla bağlı araşdırmalar aparılacaq və nəticlərə KİV vasitəsi ilə ictimaiyyətin diqqətinə çatdırılacaq.
Təqdimatda çıxış edən Xeberle.com saytının baş redaktoru Elnur Ağayev söyləyib ki, layihə çərçivəsində digər maarifləndirici tədbirlərin də həyata keçirilməsi nəzərdə tutulub. Belə ki, ictimai dinləmələrlə yanaşı, bu mövzuyla bağlı iki verilişin də hazırlanması nəzərdə tutulur. Eyni zamanda mövzuyla bağlı sosial çarx hazırlanacaq və KİV-lərdə işıqlandırılacaq. E. Ağayev bu sahədə digər jurnalistləri, gəncləri də fəal olmağa səsləyib. O, gələcək təhlükələrin qarşısının alınması məqsədilə insan alveri qurbanlarının tapılması, onların başına gələnlərin ictimaiyyətə çatıdırılması baxımından səylərin artırılmasını da təklif edib. Baş redaktor əlavə edib ki, anonimlik qorunmaq şərtilə belə insanların yaşadıqları haqqında məlumat alan potensial qurbanlar artıq daha ayıq və diqqətli olacaq, ani təhlükə zamanı hara və necə müraciət edəcəkləri barədə maariflənəcəklər.
"Qadın Təşəbbüsü və Sosial Problemlərin Həllinə Yardım” İctimai Birliyinin sədri Zenfira Mustafayeva insan alveri, məcburi əmək və sair bu kimi hallarla rastalaşan şəxslərə pulsuz hüquq və psixoloq yardımı təklif edib. O, həmçinin qurbanların müraciət etməli olduqları Daxili İşlər Nazirliyinin qaynar xətti barədə də məlumat verib və təşkilatda mütəmadi olaraq insan alveri qurbanlarına və potensial qurbanlara həmçinin sosial, tibbi yardımların da göstərildiyini
bildirib. Təşkilat sədri çıxışı zamanı qeyd edib ki, insan alveri ilə mübarizə mövzusunda təlimlər və görüşlər Sumqayıt gəncləri arasında mütəmadi və davamlı olaraq təşkil olunmalıdır.
Sonra layihə üzrə huquqi yardım məsələləri üzrə mütəxəsis Ruslan Mustafazadə fikir və tövsiyələrini bildirib. R. Mustafazdə çıxışında bu sahədə olan qanunvericiliydən geniş bəhs edib.
Daha sonra təqdimat mərasiminin iştirakçıları fikir və düşüncələrini bölüşüblər.

Xəbərdən istifadə edərkən istinad etmək vacibdir.