Azərbaycan uzunömürlülər diyarıdır, desək, yanılmarıq. Gözəl təbiət, sağlam həyat tərzi insanın ömrünü uzadır. İli-ilə calayanlara əksər hallarda dağ rayonlarında rast gəlinir. Ancaq Sumqayıt sakini Məmməd Əliyev şablon fikirləri alt-üst etməyi bacarıb. Necə deyərlər, kim ki, 100 il yaşamır, günah özündədir. Məmməd kişinin yaşı 97-ni haqlayıb. Yaşı az qala bir əsrə çatan ağsaqqal müharibə veteranıdır.
Ömrünün çox hissəsi Sumqayıtla bağlı olan Məmməd Əliyev 1920-ci ildə Astaranın Şiyəkaran kəndində anadan olub. Lənkəran Pedaqoji Texnikumunu bitirdikdən sonra bir müddət Astarada ibtidai sinif müəllimi işləyib. Böyük Vətən Müharibəsi başlayanda cəbhəyə yollanıb. Sinəsi medallarla dolu olan veteran bircə təltiflərinin sayını unudub.
Tibb təhsilinin olması müharibədə dadına çatır. Yara aldıqdan sonra arxa cəbhədə - hospitalda işləməli olur. Müharibə bitəndə Özbəkistana yollanır, daha sonra ömürlük Sumqayıtda məskunlaşır. 97 yaşlı ağsaqqal uzunömürlülüyünün sirrini belə açıqlayır.
Uzun ömür sürməyini hərəkətli olmaqla, şəkərdən uzaq durmaqla və təbii qidalarla əlaqələndirən Məmməd kişi nə eynək taxır, nə də əsadan istifadə edir. Üstəlik yaradıcılıqla da məşğul olur.
Məmməd kişi düz 4 dəfə ailə qurub. Sonuncu həyat yoldaşı 8 il bundan öncə dünyasını dəyişib. O vaxtdan 97 yaşlı Sumqayıt sakini tək yaşayır. Dörd övladı, 14 nəvəsi, 16 nəticəsi və 1 kötücəsi olan ağsaqqala uzun ömür arzulayırıq. Məmməd Əliyevdən 100 yaşında görüşmək arzusu ilə ayrılırıq.
Xəbərdən istifadə edərkən istinad etmək vacibdir.
