45 il ''Gənclər şəhəri''nin baş rəssamı kimi çalışan monimentalist V.Nəzirov Sumqayıt bulvarı üçün illər öncə unikal bir layihə hazırlasa da, üzə çıxarmayıb. Xeberle.com həmin layihənin eskiz fotolarını əldə edib. Şəhərimizdə Göyərçin, Nəsimi, Üzeyir Hacıbəyov abidələrinin müəllifi olan təcrübəli sənətkarın yeni - ''Balıqqulağı içində mirvari'' əsəri görənləri valeh edib. O, sözügedən ideyanı bulvarda dənizin içinə doğru uzanan çoxfunksiyalı istirahət mərkəzi kimi görür. Layihədə konsert və digər kütləvi tədbirlər üçün tamaşaçı yeri, estrada zalı, açıq eyvanlı Şərq mətbəxi restoranı, açıq eyvanlı Avropa mətbəxi restoranı, işıqlı gəzinti terrası, habelə gəzinti xiyabanı da nəzərdə tutulur. Bununla yanaşı, hər iki mirvarinin içərisində restoranlar, ticarət mərkəzləri yer alacaq. Bir neçə mərtəbədən ibarət olacaq mirvarilərdə liftlər də quraşdırılacaq. Mütəxəssislərin fikrincə bu layihə daha çox məsrəflər hesabına başa gəlsə də, minlərlə turisti Sumqayıta cəlb edə bilər. Ümidvarıq şəhər rəhbərliyi bu əsrarəngiz ideyanı dəyərləndirəcək.