Sumqayıtda 8 Mart Beynəlxalq Qadınlar Günü və Novruz Bayramı münasibəti ilə bir sıra tədbir keçiriləcək.
Bu barədə Xeberle.com-a eksklüziv açıqlamasında Sumqayıt Regional Mədəniyyət və Turizm İdarəsinin rəisi Mehman Şükürov bildirib.
İdarə rəisinin sözlərinə görə bayram tədbirlərinə martın 6-da start veriləcək və bu tədbirlər martın 18-dək davam edəcək: "Mart ayının 6-dan başlayaraq kitabxanalarda, mədəniyyət klublarında 8 Mart Beynəlxalq Qadınlar günü münasibəti ilə bağlı tədbirlər keçiriləcək. Şəhər tədbirinin isə martın 7-də keçirilməsi planlaşdırılır.”
Novruz şənlikləri isə martın 15-dən başlanacaq. İdarə rəisi bildirib ki, bayramın böyük təntənə ilə qeyd olunması üçün nazirlikdə müvafiq tədbirlər planı tərtib olunub, əlaqədar təşkilatlara və şəxslərə müvafiq tapşırıqlar verilib: "Təkcə Sumqayıtda deyil, 5 rayonda, eləcə də hər il olduğu kimi, bu il də bayram şənliklərinin hərbi hissələrdə, internat məktəblərində daha əhatəli və təmtəraqlı şəkildə təşkili nəzərdə tutulub. Ümumxalq şənliyi isə Sumqayıtın Dənizkənarı Bulvarında martın 17-si və ya 18-i tarixlərində keçiriləcək. Xəzər dənizinin sahili boyunca 4 kilometr uznluğu olan Bulvar başdan-başa bayram ab-havasına bürünəcək. Bununla bağlı tədbirdə iştirak edəcək yaradıcı şəxslər və kollektivlər müəyyən edilib. Və hər il olduğu kimi bu il də şənliyə teatr, muzey, qalereya və bədii özfəaliyyət kollektivlərinin iştirakı ilə xüsusi hazırlıq işləri görülür. Şəhərin bütün müəssisələrinin, təşkilatların, mədəniyyət və istirahət ocaqlarının, təhsil müəssisələrinin iştirakı ilə qeyd olunacaq bayram şənliyində göz oxşayan çadırlar qurulacaq, milli adət-ənənələri əks etdirən sərgilər nümayiş olunacaq, habelə bayram adət-ənənələri və Novruz personajları olan Kosa ilə Keçəlin bayram səhnəcikləri təqdim olunacaq. Bundan başqa, rəqs ansambllarının çıxışı və maraqlı musiqi nömrələri də bayram tədbirinə xüsusi ovqat qatacaq.”
Bununla yanaşı Novruz şənliyində göz oxşayan çadırlar, nəhəng səmənilər, milli məişət adət-ənənələri əks etdirən sərgilər, bölgələrə məxsus mətbəx nümunələri, kənd təsərrüfatı məhsulları, bayram adət-ən-ənələri nümayiş olunacaq, xalq tətbiqi sənət nümunələri sərgilənəcək.
İdarə rəisi açıqlamasında onu da qeyd edib ki, il ərzində şəhərdə bir sıra mədəni-kütləvi tədbirin keçirilməsi də planlaşdırılır: "Bu il şəhərimizdə caz festivallarının keçirilməsi, yazıçı, şair və dramaturqlarla görüşlərin təşkili və yaxın günlərdə Sumqayıtda ilk dəfə olaraq kinoteatrın açılışı və şəhərimizin bir neçə yerində kinoklubların tikilməsi tədbirlər planının həyata keçirilməsi nəzərdə tutulub.”
Fərqanə Abdulova
Xeberle.com
Xəbərdən istifadə edərkən istinad etmək vacibdir.
