İlham Əhmədovun sözlərinə görə, bayram tədbiri mart ayının 18-i saat 11.00-da Sumqayıt şəhər "28 May" mədəniyyət evinin qarşısında açıq havada təşkil olunacaq. O bildirib ki, keçən il Novruz şənliyi məcburi köçkünlərin sıx məskunlaşdığı məntəqələrdə keçirildsə də, bu il mərkəz olaraq "28 May" Mədəniyyət evi seçilib. İlham Əhmədov onu da qeyd edib ki, hər il olduğu kimi, bu il də Novruz bayramının yaddaqalan olması və adət-ənənələrimizin qorunması istiqamətində ciddi hazırlıq işləri görülür və tədbir üçün nəzərdə tutulan 40 metr uzunluğu olan ərazidə təxminən 15 kəndin (Qəsəbə, Xanlıq, Hal, Mahmudlu, Qayalı, Xocahan, Xocamsaxlı, Fərcan, Muradxanlı, Cıbıkli, Əyın, Xocık, Qaralar, Muskanlı, Dondarlı) icra ərazi nümayəndələrinin, eləcə də onların tabeliyində olan bir neçə kəndin milli-məişət adət-ənənələrini əks etdirən sərgilər, bölgələrə məxsus mətbəx nümunələri nümayiş olunacaq. İlham Əhmədov həmçinin bildirib ki, bu ilin bayram şənliyi açıq havada nənələrin isti yuxa yayması, nehrə yağı hazırlaması, muzey sərgiləri, idmançılar və kəndirbazların təqdim edəcəyi nömrələr, Novruz personajları olan Kosa ilə Keçəlin bayram səhnəcikləri, xoruz döyüşü, habelə digər bayram adətləri, rəqs ansambllarının çıxışı və bir-birindən maraqlı musiqi nömrələri ilə yadda qalacaq. Hər il olduğu kimi, bu il də mədəniyyət evinin özfəaliyyət kollektivi bayram şənliyini bir neçə hərbi hissədə konsert proqramı ilə davam etdirəcək. İdarə rəhbəri açıqlamasında onu da qeyd edib ki, il ərzində bir sıra tədbirin keçirilməsi də nəzərdə tutulub: "Dahi şəxsiyyət, ulu öndər Heydər Əliyevin doğum günü, 28 may Respublika günü ilə bağlı, ümumilikdə təqvimlə əlaqəli olan bütün tədbirlərin təşkili və eləcə də Azərbaycanın Milli Qəhrəmanı Əliyar Əliyevin bu il anadan olmasının 60 illiyinin iri həcmdə keçrilməsi nəzərdə tutulub."