HAŞİYƏ: Elvin Mirzəyev 1981-ci ildə Sumqayıt şəhərində anadan olub. 1998-ci ildə Azərbaycan Tibb Universitetinə daxil olub və 6 il sonra oranı müvəfəqiyyətlə bitirib. 2005-ci ildə Sumqayıt şəhər Təcili Tibbi Yardım Xəstəxanasının cərrahiyyə şöbəsində internatura keçib. 2007-ci ildə Türkiyə Cümhuriyyəti (TC) Ankara Etlik İxtisas Xəstəxanasında laparoskopik endoskopik , 2009-cu ildə isə ABŞ-ın Kaliforniya ştatında Anaheim Regional Medical Centerdə laparoskopiya ixtisası üzrə kurs keçib. 2013-cü ildə TC İstanbul Fateh Sultan Mehmet Eğitim Araştırma Xəstaxanasında obezite və metobolik cərrahiyyə kursunda iştirak edib. 2017-ci ilin aprelindən "Unikal klinika”da işləyir.

-Öd kisəsində daşların əmələ gəlməsinin əsas səbəbi nədir?

-Bunun bir çox səbəbi var. Əsas səbəbləri irsi meyillilik, metobolizmin pozulması, mübadilə pozğunluğu, hamiləlik, yağlı qidalardır.

-Öd kisəsindəki daşların təbii yolla əridilməsi mümkündürmü?

-Ümumiyyətlə öd kisəsindəki daşlar iki cür olur: rentgen neqativ və rentgen pozitiv daşlar. Rentgen pozitiv daşları dərman və təbii yollarla əritmək mümkün deyil, çünki onlar bərk daşlardır. Amma rentgen neqativ daşları əritmək olur. Lakin bu üsul uzun və baha başa gəlir. Xüsusi dərman preparatları var ki, onları uzun müddət içmək lazımdır.

-Öd kisəsi əməliyyatından sonra orqanizmdə nə kimi problemlər yarana bilər?

-İnsan orqanizmində heç bir problem yaranmır. Sadəcə həzm prosesində bir sıra dəyişiklik olur və o da qısa müddətdən sonra öz normal fəaliyyətinə qayıdır. Bunun üçün xüsusi pəhrizlər saxlanılmalıdır.

-Laparoskopik xolesistektomiya əməliyyatı nə deməkdir və bu əməliyyat necə həyata keçirilir?

-"Laparo” qarın boşluğu, "skopiya” baxıram deməkdir. Laparoskopik xolesistektomiya əməliyyatı ümumi narkoz altında aparılır, yəni xəstə yatır və heç bir ağrı hiss etmir. Qarın divarında 0.5-1 sm uzunluğunda 4 kəsik açılır. Bu kəsiklərdən qarın boşluğuna troakarlar daxil olur. Troakarlar boruya bənzəyir və onların içi ilə əməliyyat zamanı istifadə olunan alətlər daxil olunur. Alətlər troakarlar vasitəsi ilə qarın boşluğuna salınır və monitora baxılaraq əməliyyat həyata keçirilir. Qarın boşluğunda rahat işləmək üçün ora steril qaz vurulur. Bu zaman monitorda qarın boşluğu orqanları çox aydın görünür. Bu əməliyyat 30 dəqiqə davam edir. Xəstədə qan itirmə olmur. Əməliyyatdan sonrakı dövr də çox rahat keçir.

-Açıq (ənənəvi) və qapalı (laparoskopik xolesistektomiya) əməliyyatlar arasında fərqlər nələrdir və xəstələrə ən çox hansını məsləhət görürsünüz?

-Pasiyentlərə daha çox laparoskopik xolesistektomiya əmliyyatını məsləhət görürəm. Çünki açıq üsulda əməliyyat müddəti uzun olur və xəstə öz əmək qabiliyyətini gec bərpa edir. Amma laparoskopik xolesistektomiya əməliyyatı zamanı qarın boşluğuna heç bir alət yerləşdirilmir və əməliyyatdan sonra yırtıq əmələ gəlmir. Həmçinin xəstə öz əmək qabiliyyətini tez bir zamanda bərpa edə bilər.

-Laparoskopik xolesistektomiya əməliyyatının daha hansı üstünlükləri var?

-Laparoskopik xolesistektomiya əməliyyatından sonra ağrı bir gün və çox cüzi olur. Xəstə narkozdan ayılan kimi gəzir və özünə qulluq edə bilir. Stasionarda qalma müddəti çox qısalır (12-24 saat). Laparoskopik əməliyyat kosmetik əməliyyatdır, bir neçə aydan sonra heç bir izi qalmır.Əməliyyatdan sonra narkozdan ayılan kimi xəstə maye qəbul edə bilər. Əməliyyatın ikinci günündən az miqdarda yumşaq qida qəbul edə bilər, mayeni isə çox qəbul etməsi məsləhətlidir. Tikişlər ambulator şəraitində, 7-10 gündən sonra götürülür.
Söhbət etdi: Elnarə Salamova
Xeberle.com