"Skolyoz, onurğa yırtığı və s. kimi problemlər olduğu zaman belə banka qoymaq məsləhət deyil”
 Xeberle.com olaraq şəhərimizdə fəaliyyət göstərən müxtəlif ixtisaslı və peşəkar həkimlərlə müsahibələrimizə davam edirik. Budəfəki həmsöhbətimiz "Unikal Klinika”nın fizioterapevti Günel Nüsrətzadədir.  Günel həkimlə son zamanların ən aktual problemlərindən olan bel ağrıları, yırtıqlar barədə danışdıq.
HAŞİYƏ: Günel Nüsrətzadə 1984-cü ildə Qubadlı rayonunda anadan olub. O, 2001-ci ildə Azərbaycan Tibb Universitetinin müalicə-profilaktika fakültəsinə qəbul olub və 2007-ci ildə oranı bitirib. 2007-2008-ci illərdə Sumqayıt şəhər 1  saylı xəstəxanada müalicə işi üzrə internatura keçib. 2012-ci ildə isə Sumqayıt üzrə "İlin ən gənc həkimi” seçilib. 2015-ci ildə Sumqayıtda "Şəhərin gənc fəalı” kimi təltif olunub. O, həmçinin Sumqayıt şəhər Həmkarlar İttifaqının, Gənc Təbiblər Şurasının üzvü, Gənc Təbiblər üzrə YAP-ın sədridir. 2013-cü ildən onurğa xəstəlikləri üzrə mütəxəssisləşib və Türkiyənin İstanbul Universitetində onurğa-oynaq xəstəlikləri üzrə ixtisas artırma kursları keçib. Bundan başqa Günel həkim Kavacık Universitetində əqli və fiziki qüsurlu uşaqların reabilitasiyası üzrə kursda olub. O, 2015-cil ildən "Unikal Klinika”da fizioterapevt kimi fəaliyyət göstərir.
Günel həkim, son vaxtlar əhali arasında bel ağrılarından şikayətlənənlərin sayının artmasına səbəb nədir?
- Hər şey qidalanmadan başlayır. Qidalanmağımıza uyğun hərəkət etmirik və nəticədə çəkimiz artır. Oturaq iş şəraiti, az hərəkətlilik xüsusilə bel əzələlərinin zəifləməsinə gətirib çıxarır. Bel ağrılarının profilaktikasına uşaq vaxtlarından başlanılmalıdır. 30-40 yaşlarında olan şəxslər bel ağrısına görə bizə müraciət etdikdə biz bildiririk ki, bu ağrıların səbəbi daha əvvəlki zamanlara, yəni uşaq vaxtlarına təsadüf edir. Buna görə də uşaqlar mütəmadi olaraq idmanla məşğul olmalı, bədən tərbiyəsi dərslərinə getməlidirlər. Bel ağrılarında daxili amillər, kalsium defisiti, irsi meyillilik də böyük rol oynayır. Lakin ən əsas səbəb əzələlərimizin passivliyidir.
Bel ağrılarından şikayət edənlər hansı həddə həkimə müraciət etməlidirlər?
- Çox vaxt xəstələr son mərhələdə - artıq xəstədə bel yırtığı əmələ gələndə müraciət edirlər. Belədə onlar yerindən qalxa bilmir və nəticədə əmək fəaliyyəti məhdudluğu yaranır. Analar da uşaqlarını profilaktik müayinədən keçirmirlər. Təsadüfən, ağ ciyər patologiyasını araşdırmaq məqsədi ilə, rentgen müayinəsindən keçən zaman, yaxud da uşaq artıq üçüncü dərəcəli skolyozdur və elə bir vəziyyətdədir ki, bunu görməmək mümkün deyil və s. kimi digər səbəblərə görə gəlib bizə müraciət edirlər. Bu müraciətlər çox gec, əsasən 18-20 yaşlarında olduğundan  biz onurğaya heç bir şəkildə müdaxilə edə bilmirik. Sadəcə yüngülləşdirmə xarakterli tədbirlər görə bilirik, əzələləri müəyyən qədər gücləndiririk ki, kosmetik olaraq bədəndəki assimetriya düzəlsin, lakin var olan əyrilik olduğu kimi qalır və istədiyimiz nəticəni əldə edə bilmirik. Buna görə də bel ağrılarından şikayət edənlər elə ilk vaxtlarda həkimə müraciət etməlidirlər və müayinədən keçməlidirlər  ki, biz vaxtında müdaxilə edə bilək və gələcəkdə yarana biləcək fəsadların qarşısına alaq.
Çox vaxt belimiz ağrıyan kimi masaja müraciət edirik. Bu nə dərəcədə doğrudur?
-Bel problemlərində masajın əks göstəriciləri ola bilər. Bizim hazırda ən böyük mübarizələrimizdən biri əhalini masajdan yayındırmaqdan ibarətdir. Çünki masaj edən şəxs tetik nöqtə masajını, akupunktur nöqtələri, əzələ istiqamətini bilməlidir. Əzələnin funksiyasını bilməyən masaj etməməlidir. Masaj üçün xüsusi göstəriş olmalıdır. Məsələn, serebral iflici olan uşaqlar var ki, onlar spastik vəziyyətdədirlər və əzələrindəki kontrakturu miofasiyal genişləndirmək lazımdır. Bu hallarda masaj vacibdir. Lakin onurğanın sağı solu əzələdir və bu əzələlər güclü olmalıdır ki, yük onurğaya düşməsin və onurğa əyilməsin. Masaj edəndə isə əksinə olaraq əzələ boşalır və biz onurğanın daha da əyilməsinə şərait yaratmış oluruq. Bunun üçün də xüsusi göstəriş olmadan masajdan  çəkinmək lazımdır.
Belə banka qoymaq üçün həkimə müraciət etmək lazımdırmı və hansı hallarda belə banka qoymaq olar?
-Xeyr, xüsusi həkim icazəsi lazım deyil. Fibromiozid, paravertebral əzələlərdə spazm olduqda onurğanın üzərinə qoymamaq şərti ilə əzələlərə banka qoya bilərik. Bankanın elə bir əks təsiri yoxdur, əksinə qan dövranını artırır, toxumalardakı asidoz, süd turşusu azaldır və xəstəni rahatlandırır. Lakin skolyoz, onurğa yırtığı və s. kimi problemlər olduğu zaman belə banka qoymaq məsləhət deyil.
Beldə yırtıqların yaranmasının səbəbi nədir?
-Bu tibb elmində fəqərələrarası disk yırtığı adlanır və bu yırtıq birdən-birə yaranmır. Bizim fəqərələrimizin arasında disk var və o,  amartizator rolunu oynayır, yəni onurğamızın hərəkətliliyini, elastikliyini təmin edir. Fəqərələrarası disk olmazsa, biz hərəkət edə bilmərik.  Diskdə yaranan problemlər onurğa ətrafı əzələlərin vəziyyətindən qaynaqlanır. İlk növbədə disk quruyur və başlayır sərtləşməyə. Daha sonra o fəqərələr arasından sürüşür (buna disk sürüşməsi də deyilir) və içərisindəki maye axıb tökülür. Bu isə disk yırtığı adlanır. Bizim əzələlərimiz yaxşı vəziyyətdə olmalıdır ki, disk orda diffuziya yolu ilə qan damarlarından qanı çəkə bilsin. Disk yırtığının əmələ gəlməsində  irsi meyillilik, daxili amillər, kalsium defisiti və ən əsas əzələ zəifliyi böyük rol oynayır. Buna görə də biz disklərimizi həmişə dartılmış, tarım vəziyyətdə saxlamalıyıq, yəni disk nə qədər aralı, məsafəli qalarsa, bir o qədər bizə xeyirlidir. Bunun üçün də turnikdə sallanmalı, üzgüçülüyə getməli, dartınma hərəkətləri etməli, aktiv həyat tərzi keçirməliyik.
 Bəs onun tibbi müalicəsi varmı?
 -Əlbəttə ki, var. Əgər xəstə bizə ilk dövrlərdə müraciət edibsə bunun birmənalı olaraq müalicəsi fizioterapeya ilə olur. Lakin xəstə ağır vəziyyətdə bizə müraciət edibsə və yırtıq qarşısındakı sinirə sekvestr olunubsa, bu zaman fizioterapeya ilə müalicə artıq  vaxt itkisidir, belə hallarda nevro cərraha müaciət etmək lazımdır.
Son olaraq bel ağrılarından şikayətlənən oxucularımıza nə məsləhət görərdiniz?
-Onurğa xəstəlikləri ilə məşğul olan bir mütəxəssis kimi deyə bilərəm ki, bütün daxili orqanların açarı onurğadadır. Yəni onurğan sağlamdırsa, deməli daxili orqanların da sağlamdır. Ona görə də oxuculara  məsləhət görərdim ki, daim aktiv həyat tərzi sürsünlər, daim hərəkətdə olsunlar, sağlamlıqlarının qeydinə qalsınlar, mütəmadi olaraq idmanla məşğul olsunlar və vaxtında həkimə müraciət etsinlər.
Xeberle.com
 

 

Xəbərdən istifadə edərkən istinad etmək vacibdir.