Xəbər verdiyimiz kimi, Sumqayıtda 2 nömrəli marşrut avtobusları dəyişdirilərək yeniləri ilə əvəz olunub və öz hərəkət istiqamətini dəyişib. Bu da sakinlərin etirazına səbəb olub. Lakin dünəndən etibarən sumqayıtlılar redaksiyamıza yazıb bildirirlər ki, köhnə 2 nömrəli avtobuslar yenidən əvvəlki istiqamətdə hərəkətə başlayıblar. Müşahidələr zamanı məlum oldu ki, həqiqətən köhnə və yeni 2 nömrəli maşrut avtobusları ayrı-ayrı istiqamətlərdə fəaliyyət göstərirlər.

Əvvəlki avtobusların hərəkətini tənzimləyən "Sənan 2012” Məhdud Məsuliyyətli Cəmiyyətin məsul şəxslərindən biri olan Rizvan Məmmədov ilə əlaqə saxladıq. R. Məmmədov Xeberle.com-a bildirdi ki, köhnə avtobusların fəaliyyətinin dayandırılması "Sumqayıt Nəqliyyat” MMC-nin göstərişi əsasında olub: "Dünən günortadan sonra marşrut avtobuslarını xəttə buraxmışıq. Bizə təzyiq göstərilir ki, avtobusları xətdən yığışdıraq. Buna baxmayaraq yenə də avtobusları işlətməyə çalşırıq ki, ailəmizi dolandıraq. Çünki mənim özüm və bir nəfər şəhid ailəsi daxil olmaqla hamımız Qarabağ əlilləriyik, hər birimizin krediti və öhdəliyində olan ailəsi var. Buna görə də aldığımız təqaüd bizə bəs etmir. 1999-cu ildən bu xətti biz açmışıq. 2012-ci ildə Nəqliyyat Nazirliyi bildirdi ki, marşrut avtobusları yenisi ilə əvəz olunmalıdır və biz də yeni avtobuslar gətirərək qanuni "Sənan 2012” Məhdud Məsuliyyətli Cəmiyyətini yaratdıq. Hazırda 15 avtobus və 33 nəfər işçimiz var və onlar qanuni şəkildə, əmək müqaviləsi ilə fəaliyyət göstərirlər. Ayda 2800 AZN-ə yaxın dövlətə vergi ödəyirəm. 2016-cı ildə "Sumqayıt Nəqliyyat MMC” yaradıldı və bizi həmin quruma tabe etdilər. Oranın rəhbəri məni yanına çağırıb soruşdu ki, bizə nə qədər ödəniş edəcəksiniz?! Cavab verdim ki, mən heç kimə rüşvət vermirəm, dövlətə vergi ödəyirəm və qanunun tələb etdiyi bütün öhdəliklərimi yerinə yetirirəm. Mənə dedi ki, ona əldə etdiyimiz gəlirin yarısını, yəni 10000 manat məbləğində pul ödəməliyəm. Hətta bunun üçün bizimlə müqavilə imzalamaq istədi, hansı ki, onun surəti məndə hələ də var. Biz həmin müqavilənin surətini hörmətli Prezidentimizə, vitse-prezident Mehriban Əliyevaya da göndərmişik və onlara məktubla müraciət etmişik. Bu, hansı qanunda var ki, biz qazandığımızın 50 faizini onlara ödəməliyik?! 2016-cı ilin sentyabr ayından etibarən bizdən 4000 manat məbləğində pul alırlar. 10 gün bundan qabaq isə fəaliyyətimizi tamamilə dayandırıblar. Özü də yazılı surətdə müraciət belə etmədən. Cənab Prezidentimiz daim sahibkarlara dəstək verir, onlar üçün pul ayırır. Mən Xannı Rüstəmov ("Sumqayıt Nəqliyyat” MMC-nin direktoru) müəllimə dəfələrlə müraciət etmişəm ki, siz hansı qanuna əsasən bizim qazancımızın yarısını istəyirsiz?! Biz Qarabağ əlilləriyik, şəhid ailəsiyik və bizdə o qazanc yoxdur, lap olsa belə, nəyə görə onu sizə verməliyik?! Deyir, mənim kefim belə istəyir”.

Barəsində səslənən ittihamlarla bağlı iki gün ardıcıl olaraq "Sumqayıt Nəqliyyat” MMC-nin direktoru Xannı Rüstəmovla əlaqə yaratmağa çalışsaq da bu istəyimiz baş tutmadı. Telefon dəstəyini qaldıran olmadı.

Xeberle.com olaraq qarşı tərəfin də  mövqeyini dərc etməyə hazırıq.