Ölkənin neft-qaz, mədən sənayesi barədə bütün məlumatlar elektron-rəqəmsal şəkilə salınacaq və vahid bir bazada saxlanacaq. 

ANS TV-nin məlumatına görə, ayrı-ayrı mənbələrdə, sənədlərdə yer alan kəşfiyyat, hasilat və təmir məlumatları da bu bazada toplanacaq. Bu barədə Dövlət Neft Şirkətinin vitse-prezidenti Xalik Məmmədov neft-qaz ehtiyatlarının işlənilməsinin nəticəsi olan məlumatların istifadə olunması, ötürülməsi və idarə olunmasına həsr edilmiş konfransda məlumat verdi. 

Onun sözlərinə görə artıq bu işlərə start verilib. Amma bu, çox əhəmiyyətli və ciddi bir proses olduğundan xeyli vaxt tələb edəcək.

"Primitiv üsullarla yazılmış və köhnəlmiş məlumatlar çoxdur. Bunların yığılması 20-25 il vaxt alacaq. 6il ərzində yığdığımız məlumatlar bizə əsas verir ki, biz bu prosesi daha tez müddətdəhəyata keçirək”.

Məlumatların bir yerdə toplanması ilk növbədə geoloqlara yatağın ilkin modelini qurmağa və ehtiyatların həcmini qısa müddətdə hesablamağa imkan verəcək. Toplanan məlumatlar açıq və bağlı olmaqla 2 qrupa bölüncək. 

Açıq məlumatlar yalnız peşəkarlar üçün nəzərdə tutulub. Bağlı məlumatlar isə hər bir dövlətin milli dəyəri hesab olunduğundan müstəsna insanlar üçün açıq olacaq.