Sumqayıt şəhəri sahəsinə görə Bakıdan və Gəncədən sonra üçüncü, əhalisinə görə isə ikinci böyük şəhərdir. Ölkəmizin digər şəhərlərində olduğu kimi, doğma şəhərimiz Sumqayıtda da şəhər, respublika və ölkə miqyasında xüsusi xidmətləri olan adamlara şəhərin fəxri vətəndaşı adınının verilməsi kimi böyük bir ənənə var.
Dostluq şəhəri olan Sumqayıtda beynəlmiləlçilik və dostluq rəmzi olan bu şərəfli ad insanlara onların milli mənsubiyyətindən asılı olmayaraq verilir.
Xeberle.com-unverdiyi məlumata görə, hazırda Sumqayıtın 15 fəxri vətəndaşı var.
"Sumqayıtın fəxri vətəndaşlarını tanıyaq” rubrikasında doğma şəhərimizin ilk fəxri vətəndaşı Şatalov Vladimir Aleksandroviç haqqında məlumat vermişdik.
Bu dəfə isə Yeleseyev Aleksey Stanislavoviç  haqqında danışacağıq.
Yeleseyev Aleksey Stanislavoviç - 1934-cü ildə iyulun 13-də Jizdra şəhərində, indiki Kaluqa vilayətində anadan olub. Birinci Dünya Müharibəsindən sonra, gələcək kosmonavtın ailəsi Ryazan vilayətinə köçür. 
Alekseyin atası 1935-ci ildə antisovet təbliğatı apardığına görə 5 il müddətinə məhkum edilib.
Anası Valentina ondan boşanmaq məcburiyyətində qalıb və özünə qızlıq soyadı Yeleseyevanı götürüb. 1943-cü ildə Aleksey Kuraytis (Yeleseyev) Kokçetav vilayətinin Baravoe şəhərində ikinci sinifi bitirib. Sonrakı təhsilini 1946-cı ildə Moskva vilayətinin Nemçinovka kəndində 4 nömrəli dəmiryol məktəbində davam etdirib və 1950-ci ildə 16 yaşlı Aleksey Kuraytis soyadını dəyişərək Yeleseyev soyadını götürüb.
O, 1951-ci ildə isə Moskva şəhərində 167 saylı  orta  məktəbi bitirib. 1951-ci ildən 1957-ci ilə qədər N.E.Bauman adına Moskva Ali Texniki peşə məktəbində oxuyaraq mühəndis-mexanik ixtisasına yiyələnib.  Aleksey məktəbin göndərişi ilə OKB-1-ə laboratoriyaya işləməyə göndərilib.
Moskva Fizika Texniki İnstitutunun aspirantura şöbəsinə qəbul olur və təhsilini davam etdimək üçün laboratoriyadakı işindən uzaqlaşmalı olur.  
Gələcək kosmonavt 1962-ci ildə aspiranturanı bitirəndən sonra yenidən OKB-1-in laboratoriyasında işinə davam edir. 1966-cı il may ayının 23-də kosmonavt namizədi statusu alıb. 
Həmin ildə «Стыковка» proqramı üzrə hazırlıqlara davam edir və ilk uçuş 1969-cu ildə gerçəkləşir. Uçuş 1 gün 23 saat 45 dəqiqə 50 saniyə ərzində reallaşıb. Sumqayıtın fəxri vətəndaşı adına elə həmin il (1969-cu il) layiq görülüb.
1986-cı ildən 1991-ci ilə qədər A.Yeleseyev МВТУ-nun (Moskva Hərbi Texniki Universiteti) rektoru vəzifəsində çalışıb. 1991-ci ilin 22 oktyabrından  1994-cü ilin 31 yanvarına qədər  «IBM СССР» MMC (sonrakı adı İBM Şərqi Avropa/ Asiya təşkilatı olub) layihəsinin rəhbəri olub. 3 yanvar 1997-ci ildə АОЗТ «Фесто» (Festo) adlanan təşkilatın prezidenti vəzifəsini icra edib. Hazırda Moskvanın Bolşaya Bronnaya küçəsində kosmonavt Vladislav Volkov və Georgi Dobrovolskinin qaldıqları çoxotaqlı mənzildə yaşayır və Moskva  Energetika  İnstituna rəhbərlik edir.
Qeyd edək ki,  Yeleseyev Aleksey Stanislavoviç  Sovet kosmonavtıdır və iki dəfə Sovet İttifaqı Qəhrəmanı adına layiq görülüb.
O, bir sıra medallarla təltif olunub.
Elnarə Salamova

Xəbərdən istifadə edərkən istinad etmək vacibdir.