Haşiyə: Zümrüd Məlikova 1978-ci ildə Salyan rayonunda anadan olub. 1985-1995-ci illərdə Salyan rayon hərbi şəhərciyində, Ziyad Həmidov adına orta məktəbdə orta təhsil alıb. 2013-cü ildə reabilitasiya, 2014-cü ildə müalicəvi masaj, 2015-ci ildə isə Əlillərin Bərpa Mərkəzində 6 aylıq müalicəvi gimnastika və masaj kursunu bitirib. 2016-2017-ci illərdə Əlillərin Bərpa Mərkəzində masajçı kimi fəaliyyət göstərib. Müxtəlif təcrübələrdən keçib və bir sıra böyük seminarlarda iştirak edib.

-İdman və masaj hansı müalicəvi əhəmiyyətə malikdir?

- Müalicəvi idman və masaj üsulunu tətbiq edərək biz əzələlərin hərəkəti nəticəsində onun atrofiyaya uğramasının qarşısını alırıq və əzələləri inkişaf etdirərək onları hərəkətə gətiririk.

- Sağlamlıq mərkəzinizə uşaqlar üçün də müraciətlər olunurmu və uşaqlara hansı müalicəvi masaj və idman növləri tətbiq edilir?

- Uşağın xəstəliyinə baxılır və diaqnoz qoyulur. Diaqnoza əsasən zədələnmiş hissələr müəyyən edilir. Əgər əzələlərin masaja ehtiyacı varsa, həkimin təyinatına əsasən xəstəyə masaj tətbiq olunur.

- Hansı xəstəliklərin müalicəsi üçün bu terapeya üsulu həyata keçirilir?

- Masaj ilk olaraq əzələlərin gücləndirilməsinə istiqamətləndirilir. Bu müalicə üsulu tonusu azaldır və zədələnmiş bölgədə qan dövranının yaxşılaşdırılmasında böyük rol oynayır. Masajın skolyoz, osteoxondroz, insult xəstəliklərinin müalicəsində əvəzsiz rolu vardır.

- Sağlamlıq mərkəzinizdə masajın hansı növləri icra edilir?

- Masaj növu xəstənin probleminə görə müəyyən olunur. Ən çox serebral iflic, insult, parkinson, tetraparez kimi xəstəliklərin müalicəsi üçün müalicəvi masaj və idman tətbiq edirik. Bundan başqa əzələ və sinirlərlə bağlı digər xəstəliklərin müalicəsini həyata keçirir və elektrik impulsu ilə sinirin qıcıqlanması , əzələ oynaqlarının bərpasını icra edirik.

- Mütəxəssis rəyi olmadan müalicəvi masaj və idman terapeyasının həyata keçirilməsi nə dərəcədə doğrudur?

- Həkim təyinatsız (nevropotoloq, travmatoloq və s.) xəstəyə masaj və idman müalicəsini tətbiq etmək düzgün deyil. Hazırda sağlamlıq mərkəzimizdə də həkimin təyinatı olmadan müalicəvi masaj və idman terapeyası həyata keçirilmir.

- Uşaqlarda ən çox hansı xəstəliklərin müalicəsi üçün masajın böyük rolu var?

- Uşaqlarda ən çox skolyoz, kifoz, lordoz xəstəliklərinin müalicəsi üçün müalicəvi masaj və idman tətbiq olunur. Son zamanlar uşaqlarda serebral iflic xəstəliyinin müalicəsində böyük uğurlar qazanmışıq.

- Son olaraq nə demək istərdiniz...

- Mütəxəssis kimi deyə bilərəm ki, müxtəlif nailiyyətlər əldə etmişəm. Böyük seminarlarda, reablitasiya mərkəzlərində bu sahə üzərində araşdırmalar aparmışam. Fizioterapeyanın insan üçün böyük əhəmiyyətini gördükdən sonra, özümü bu sahə üzrə daha da təkmilləşdirməyə başladım. Çalışdığım sağlamlıq mərkəzində də onlarla xəstə müalicəvi idman və masaj terapeyasının böyük faydalarını görüblər.

Elnarə Salamova

Xeberle.com