HAŞİYƏ:İsmayılova Nəzakət 1976-cı ildə Sumqayıt şəhərində anadan olub. 1993-cü ildə Sumqayıt şəhər Təbiət Elmləri Təmayüllü Gimnaziyanı bitirib və 1993-2000-ci illərdə Azarbaycan Dövlət Tibb Universitetində pediatriya fakültəsi üzrə təhsil alıb. Daha sonra Sumqayıt şəhər 1 saylı Uşaq Poliklinikasında həkim-pediatr kimi fəaliyyət göstərməyə başlayıb. 2014-cü ildə "Bakı Bioloji Təbabət Klinikası”nın fizioterapiya şöbəsində həkim-fizioterapevt kimi fəaliyyət göstərib və elə həmin mərkəzdə iynəbatırma proseduru üzrə təkmilləşdirmə kursu keçərək bu sahədə fəaliyyət göstərməyə başlayıb. 2015-ci ildə Türkiyənin İstanbul şəhərində yerləşən "Anadolu Medical Center”də fizioterapiya və reabilitasiya ixtisası üzrə təkmilləşdirmə kursunda iştirak edib və sertfikatla təltif olunub. 2015-ci ilin noyabr ayından "Yaşa Sağlamlıq Mərkəzi”ndə baş həkim, fizioterapevt və reabilitoloq kimi fəaliyyət göstərir.

- Nəzakət xanım, zəhmət olmazsa, fizioterapiya və reabilitasiya haqqında qısa məlumat verərdiniz... Fizioterapiya və reabilitasiyanı bir tam olaraq düşünə bilərikmi?

- Fizioterapiya tibbi müalicə vasitələrindən biridir. Onun bir çox metodları var, amma bizim sağlamlıq mərkəzimizdə daha çox dayaq sistemlərinə aid metodlardan istifadə olunur. Yəni elektrik, lazer, elektromaqnit vasitəsilə müalicə edirik. Lazım olduğu təqdirdə müalicəvi bədən tərbiyə, masaj seanslarını da tətbiq edirik. Reabilitasiya isə bədənin itirilmiş funksiyalarının bərpası deməkdir və bərpanı da biz fiziki və müalicəvi hərəkətlər vasitəsilə əldə edirik. Bu da fizioterapiya ilə reablitasiyanın bir-birilə əlaqəsindən irəli gəlir.

- Fizioterapeya və reablitasiyanın məqsədi və faydaları nələrdir?

- Fizioterapiya zamanı əsasən dərialtı toxumaları elektriklə, yəni ultrasəslə dərmanı orqanizmin lazımi nahiyələrinə yeridilir. Fizioterapiyanın üstünlüyünün əsas səbəbi dərmansız, ağrısız, kəsiksiz müalicə metodu olmasındadır. Bizim sağlamlıq mərkəzimizdə tibbin bütün sahələrinə aid fizioterapiya müalicəsi aparmaq mümkündür (beyin cərrahiyyəsindən tutmuş ortopedik cərrahiyəyə qədər, idman, onurğa əyriliyinin, oynaq ağrılarının reabilitasiyası və s.).

- Uşaqlarla böyüklərə fizioterapeyanın tətbiq olunmasında nə kimi fərqlər var?

- Fizioterapiyanın həyata keçirilməsində uşaqlarla böyüklər arasında heç bir fərq yoxdur. Sadəcə xəstəliyin diaqnozu qoyulur və ona əsasən biz istər uşaqlara, istərsə də böyüklərə müalicə metodları tətbiq edirik.

- Bəs fizioterapeya və reablitasiyanın həyata keçirilməsi zamanı hansısa risk faktorları ilə qarşılaşmaq ehtimalı varmı?

- Xeyr, heç bir halda fizioterapiyanın əks təsiri yoxdur. Əksinə fizioterapiya hər bir xəstə üçün müalicəvi əhəmiyyətə malikdir. Sadəcə onu onkoloji xəstələrə tətbiq etmək düzgün deyil.

- Sağlamlıq mərkəzinizdə fizioterapeyanın həyata keçirilməsində hansı müasir texnlogiyalar tətbiq olunur?

- Mərkəzimizdə ən son tələblərə cavab verən və İsveçrə istehsalı olan "Çetanovka” adlı müasir tibbi avadanlıqlardan istifadə olunur və bu avadanlıqlardan istifadə etməklə biz xəstələri rahat şəkildə ağrısız, kəsiksiz, dərmansız müalicə edə bilirik.

Son olaraq bir həkim kimi nə demək istərdiniz..?

- Sağlamlığımız hər şeydən önəmlidir və onu qorumaq üçün əlimizdən gələni etməliyik. Bizim də işimiz onu qorumaqda insanlara yardımçı olmaqdır. Eləsağlamlıq mərkəzimizin simvolik ifadəsi də bundan ibarətdir: "Sizin sağlamlığınız bizim peşəmizdir!”.

Elnarə Salamova

Xeberle.com