Yəqin ki, bir çoxumuz iş görüşməsinə gedərkən ilk olaraq sınaq müddətinə cəlb olunma haqqında eşitmişik. Quruma görə dəyişən bu müddət ya işçinin görəcəyi işi öyrənməsi üçün, ya da ki, şirkətin sözügedən müddət ərzində xərcləmələrini azaltmaları üçün tətbiq olunur.
Bəs qanuna görə sınaq müddəti nə qədər olmalıdır? Həmin müddət kimlərə tətbiq oluna bilməz?
Xeberle.com olaraq bu haqda məlumat əldə etmək üçün hüquqşünas Ramil Süleymanovla əlaqə saxladıq. R.Süleymanov bildirdi ki, sınaq müqaviləsi 3 aydan çox olmamaq şərti ilə bağlanmalıdır: "Əmək Məcəlləsinin 15-ci bəndinin 1-ci maddəsinə görə, sınaq müqaviləsi 3 aydan çox olmamaq şərtilə bağlanmalıdır. Məcəllədə minumum müddət göstərilməsə də, sınağın maksimum müddəti 3 aya qədərdir. Bu müddət ərzində işçilərə məvacib ödənilməlidir. Hətta iş zamanı xəsarət aldıqları və əmək qabiliyyətlərini itirdikləri təqdirdə həmin şəxslərə orta aylıq əmək haqqı saxlanılmaqla maaş verilməlidir. Amma bu müddət sınaq müddətinə daxil olmur. Tutaq ki, işçi ilə 2 aylıq sınaq müqaviləsi bağlanılıb. Həmin müddət ərzində işçi 1 həftə hər hansı bir səbəbdən icazə alırsa, işə qayıtdıqdan sonra 2 ay keçsə belə bir həftə əlavə işləməlidir. Yaşı 18-dən az olan işçilər, işə müsabiqə yolu ilə daxil olan şəxslər, universiteti bitirərək öz peşəsi üzrə ilk dəfə əmək müqaviləsi bağlayanlar, hamilə qadınlar, 3 yaşına qədər uşağı olan analar və bu yaşa qədər olan uşağı tək böyüdən kişilərə sınaq müddəti tətbiq oluna bilməz”.
Elnarə Salamova
Xeberle.com
Xəbərdən istifadə edərkən istinad etmək vacibdir.
