İtlərlə müalicə kanisterapiya adlanır. Bu üsul ölkəmizdə yeni olsa da, İngiltərədə 1792-ci ildən tətbiq edilir. Son 50 ildə isə amerikalı uşaq psixoloqu Boris Levinson həmin müalicə üsulundan fəal istifadə etməyə başlayıb. Onun ilk xəstələri isə uşaqlar olub.

Paytaxtdakı 1 nömrəli psixiatriya xəstəxanasında da həmin müalicə üsulundan istifadə edilir. Xüsusilə ruhi xəstələrin itlərlə müalicəsi yaxşı səmərə verir. Xəstələrin itlərlə təması, onlara qulluq göstərməsi və gəzinti prosedurları həyata keçirilir. Tətbiq edilən həmin prosedurlar xəstələrin əsəblərinin sakitləşməsinə səbəb olur.

İtlərlə müalicə Yaponiyada da özünü doğruldub.

Bəs itlərlə müalicənin hansı psixoloji təsirləri ola bilər?

Məsələ ilə bağlı Xeberle.com-a açıqlama verən psixoloq Sevinc Baxışova bildirdi ki, bu müalicə üsulu şəxsiyyətin formalaşmasına, reabilitasiya və sosial adaptasiyanın effektivliyinin güclənməsinə kömək edir:

"İtlər insanlara oxşar bəzi xüsusiyyətlərə malikdirlər. Onlar insanların kommunikasiya təşəbbüslərinə öz həyəcanlarını hərəki, mimiki reaksiyalarla ifadə edirlər. Bundan başqa onlar şifahi komandaları tez öyrənib tabe olurlar. Kanisterapiya tez-tez psixoterapevtik metodika kimi istifadə olunur. Hansı ki, bu əqli inkişafa və emosional bacarığa, hərəki funksiyaların və materikanın inkişafına səbəb olur. Eləcə də qeyri-standart inkişaflı uşaqlarda bu metod şəxsiyyətin formalaşmasına, reabilitasiya və sosial adaptasiyanın effektivliyinin güclənməsinə kömək edir. Dördayaqlılarla ünsiyyət həyəcanı azaldır, ümumi şəxsi adaptasiyanı yüksəldir və autizmin müalicəsinə kömək edir. Hətta məsafəli müşahidə və ünsiyyət insanın daxili sağlamlığını təmin edir”.

Qeyd edək ki, itlərlə müalicə üsulu əsasən şizofreniya, alkoqolizm, depresiya və travmadan əziyyət çəkən xəstələrə tətbiq edilir. Onkoloji xəstəlikdə müalicə olunan uşaqlar itlərlə təmasdan sonra həkimlərin məsləhətinə çox rahat şəkildə əməl edirlər. Hətta sutkalarla qidalanmaqdan imtina edənlər iştaha gələrək yemək istəyirlər.

Elnarə Salamova

Xeberle.com