Bu sözləri Xeberle.com-a açıqlamasında Kənd Təsərrüfatı Nazirliyinin Bitkiçilik Şöbəsinin rəisi İmran Cümşüdov bildirib. Onun sözlərinə görə, həm heyvandarlıq, həm də bitkiçilik baxımından bu ili təsərrüfat ili hesab etmək olar:

 

"Taxıl bitkiləri baxımından da bu ili əlverişli hesab etmək olar. Bilirsiniz ki, dənli taxıl bitkiləri ümumi əkin sahəsinin 60 faizinə qədərini təşkil edir. İndiyə qədər heç bir problem görülməyib. Kənd təsərrüfatı bütövlükdə təbiətlə bağlı olan bir sahədir. Ona görə də hər hansı bir fəsad olmazsa, külək əsməzsə və ya dolu yağmazsa, bu il demək olar ki, tam itkisiz şəkildə keyfiyyətli və yararlı məhsul tədarük edə biləcəyik. O ki qaldı yazlıq bitkilərin (pambıq, qarğıdalı, şəkər çuğunduru və s.) əkininə, onlar üçün də bu il əlverişli hava şəraiti olub. Pambıq suya tələbatı olan bitkidir (vegetasiya dövründə 4-5 dəfə suvarılır) və suvarma gedişatı indiyədək normal şəkildə aparılıb. Amma ola bilsin ki, bundan sonra suvarma bölgələrində su çatışmazlığı hiss olunsun. Bütövlükdə təsərrüfat sahəsi ilə məşğul olan biri kimi deyə bilərəm ki, bu il məhsul qıtlığının yaşanmasını proqnozlaşdırmırıq. Həm heyvandarlıq, həm də bitkiçilik baxımından bu ili təsərrüfat ili hesab etmək olar”.