Xeberle.com olaraq bu suala cavab tapsınlar deyə valideynlərə məsləhət verməsi üçün təhsil eksperti Kamran Əsədov ilə əlaqə saxladıq. K.Əsədov bildirdi ki, repetitor yanına gedən şagirdlərin topladıqları orta bal daha yüksək olur: "Artıq Azərbaycanda repetitorluq sistem olaraq oturuşub. Amma konkret faktlar üzərində danışsaq, deyə bilərik ki, bu gün repetitorların göstərdikləri xidmət müqabilində aldıqları əmək haqqı kursların aylıq haqlarına bərabər olur. Rayonlarda şagirdlər bir müəllim yanına aylıq 30-40 AZN arası pul ödəniş edirlərsə, Bakıda uzun müddət bu sahədə məşğul olan peşəkar repetitora valideyn aylıq 80-150 AZN arası pul ödəyir. 5 fənn üçün 80 AZN-dən hesabladıqda ortaya 400 AZN civarında bir məbləğ çıxır. Amma hazırlıq kurslarında sözügedən məbləğ 200-250 AZN arasında dəyişir. Keyfiyyət göstəricilərinə gəldikdə isə deyə bilərəm ki, hazırlıq kurslarında fəaliyyət göstərən müəllimlərin əksəriyyəti bu sahə üzrə yeni məşğul olan müəllimlərdilər. Onların sahə üzrə çox təcrübələri olmasa da, həvəslidirlər. Onlar çalışırlar ki, daim yeniliklər tətbiq etsinlər və sonra da repetitor kimi fəaliyyət göstərməyə başlasınlar.

Bu gün repetitor kimi fəaliyyət göstərən müəllimlərin böyük əksəriyyəti məhz hazırlıq kurslarının müəllimləri olublar. Bir neçə il çalışdıqdan sonra əhatə dairləri genişlənib və nəticədə repetitor kimi fəaliyyət göstərməyə başlayıblar. Repetitorlar çoxu isə ənənəvi formada test işlədirlər. Valideynlər övladlarının nəticələrini izləməkdə çətinlik çəkirlər. Kurslarda isə hər həftə, hər ay sınaq imtahanarı keçirilir və valideynlərə uşaqlarının vəziyyəti ilə bağlı məlumat verilir. Amma təəssüf ki, bəzən bu məlumatlarla bağlı valideynləri çaşdırır, aldadırlar. Bir çox hallarda kursların müəllimləri öncədən sualları uşaqlara işlədirlər ki, onların nəticələri yüksək olsun. Hazırlıq kurslarının ən ciddi təhlükəsi və problemi odur ki, reklam xarakterli məlumatlarda özlərinin nəticələrinin yüksək olduğunu göstərirlər. Hər il hazırlıq kurslarına qəbul ilə bağlı imtahanlar keçirilir. Nəticəsi yüksək olan şagidləri "A” sinifinə götürürlər və onlarla peşəkar müəllimlər məşğul olur. Reklam və digər məsələlərdə də məhz həmin şagirdlər önə çıxarılır. Digər qruplarda isə nəticələr aşağı səviyyədədir. Onsuz da hər il ali məktəblərə sənəd verənlərin 50 faizi keçid balını toplamırlar. Onların içərisində repetitor yanına, hazırlıq kurslarına gedənlər də var.

Hazırlıq kurslarında bir binada 5 fənn tədris olunur və bir otaqda 10-12 nəfərə dərs keçirilir. Bu, orta məktəbdən o qədər də fərqlənmir. Repetitor yanına gedənlər üçünsə bir dərsin müddəti minimum 2 saat təşkil edir, qruplarda uşaqların sayı isə 10 nəfər olur. Ona görə də hazırlıq kurslarında zəif biliyə malik uşaqlar oxuya bilməzlər, yalnız güclü biliyə sahib uşaqlar orada müəyyən nəticə əldə edə bilərlər. Müqayisə etsək ki, hazırlıq kurslarına gedən şagirdlərin nəticələri daha yüksəkdir, yoxsa repetitor yanına, birmənalı olaraq deyə bilərəm ki, repetitor yanına gedənlərin topladığı orta balı daha yüksəkdir. Çünki repetitorlar şagirdləri digər fənlərdən də daha peşəkar müəllimlər yönləndirirlər ki, yekun nəticə də onların xeyrinə olsun. Amma hazırlıq kursları isə dediyim kimi bir qrupu reklam edib onunla bazara daxil olmaq istəyirlər və bu kurslara müraciət edən valideynlər əsasən maddi imkanları aşağı olanlardır.

Onlar ya övladlarını repetitor yanına qoya bilmirlər, ya da istəmirlər ki, uşaqları uzaq məsafəyə repetitor yanına getsinlər, bütün fənlər eyni məkanda tədris olunduğuna görə kurslara müraciət edirlər”.

K.Əsədov qeyd etdi ki, şagird ali məktəbə nə hazırlıq kursunda, nə də repetitor yanında hazırlaşmamalıdır: "Bu gün Azərbaycanda kifayət qədər hazırlıq kursları var. Amma onlar keyfiyyət artımına o qədər də ciddi şəkildə nail ola bilməyiblər. Hətta valideynlərə verilən vədlərin yalan olduğu kifayət qədər kurslar da var. Hesab edirəm ki, şagird ali məktəbə nə hazırlıq kursunda, nə də repetitor yanında hazırlaşmamalıdır. Çünki bu orta məktəbin tədris proqramıdır və bu məktəblərdə təhsilin keyfiyyəti artırılmalıdır ki, valideynlər öz ciblərindən vəsait xərcləməsinlər. Dövlət də o uşaqların oxuması üçün pul ayırır, valideynlər də. Bu düzgün deyil. Ya orta məktəbləri bağlamaq lazımdır, ya da qeyd etdiyim əlavə təhsil metodları ləğv olunmalıdır”.