"Hazırda Azərbaycanda yay düşərgələrinin vəziyyəti o qədər də ürəkaçan deyil”.

"Təhsil müddəti başa çatdıqdan sonra bütün valideynlərin birmənalı şəkildə düşündükləri yalnız uşaqların yay tətilini səmərəli keçməsi ilə bağlı olur. Sovet dönəmində Azərbaycanda məktəblərdən yay tətilində uşaqlar düşərgələrə aparılırdı. Hansı ki, orada uşaqların fəaliyyəti yalnız onların yatıb-durmaları ilə bağlı deyildi. Orada onların asudə vaxtlarını səmərəli istifadəsi və təşkili həyata keçirilirdi. Yəni yay düşərgələri dedikdə əsasən uşaqların tədris müddətində əldə etdikləri bilik və bacarıqların tətbiq edilməsi nəzərdə tutulur. Mənim araşdırmalarıma görə, Azərbaycanda hal-hazırda 16 düşərgə fəaliyyət göstərir ("Qaranquş”,Çingiz Mustafayev adına düşərgə və s.). Avropa və Amerikada bu düşərgələr ödənişli olsalar da, bütün uşaqları əhatə edə bilir. Amerikada elə yer var ki, bir dəfəlik ödəniş 25000 manatdır. Azərbaycanda düşərgələrin qiyməti 400-500 manatdır və ölkəmiz üçün bu rəqəm kifayət qədər yüksəkdir. Azərbaycanın təkcə 4500 ümumtəhsil məktəblərində 1,6 milyon şagird təhsil alır. Amma onların 200 nəfərinin dövlət tərəfindən yay düşərgələrinə cəlb olunması həyata keçirilir. Bütün uşaqlar düşərgələrə cəlb olunmaq istəsələr belə buna nail ola bilmirlər. Lakin Avropa və Amerika ölkələrində bütün uşaqları əhatə etmək infrastrukturuna malik olan yay düşərgələri fəaliyyət göstərir. "İdeya İctimai Birliyi”, "Ümumdünya Vəhşi Təbiətin Qorunması Təşkilatı” və s. Azərbaycan bölgələrində yalnız qısamüddətli (3-5 günlük) yay düşərgələri təşkil edirlər. Bu da kifayət qədər azdır. Dünya təcrübəsində göstərilir ki, düşərgələrin müddəti minimum 10, maksimum 26 gün olmalıdır. Gündəlik proqram tərtib olunmalıdır ki, şagirdlərin hansı bilik və bacarıqlara yiyələnəcəkləri və ya hansı nəzəri-praktiki işlə məşğul olacaqları əvvəlcədən müəyyənləşsin. Hesab edirəm ki, Azərbaycanda düşərgələrin sayının artmasına ehtiyac var. Bu həm də əlavə iş yerlərinin açılması deməkdir. Hazırda Azərbaycanda fəaliyyət göstərən 54 universitetdə 164.000 tələbə təhsil alır. Düşünürəm ki, dilbər guşələrimizdə düşərgələr təşkil etməklə həmin tələbələri işə cəlb etmək olar. Bu da müddətli və mövsümi iş yerlərinin açılması deməkdir”.

Təhsil Nazirliyindən bildirilib ki, uşaqların yay tətilini səmərəli keçirməsi üçün sözügedən nazirlik və bir neçə qurum tərəfindən pulsuz yay düşərgələri təşkil olunur: "Təhsil Nazirliyinin əməkdaşlarının uşaqları üçün ”Təhsil” Respublika İdman Mərkəzinin Zağulba Tədris İdman Bazasında iyulda düşərgə təşkil ediləcək. Bundan başqa, Uşaq-Gənclər İnkişaf Mərkəzi, İDEA İctimai Birliyi və Ümumdünya Vəhşi Təbiəti Mühafizə Fondunun Azərbaycan Nümayəndəliyinin birgə əməkdaşlığı ilə iyulda Lerik rayonunda "Bəbirləri mühafizə edək”, İsmayıllı rayonunda "Zubrları təbiətimizə qaytaraq”, Qax rayonunda "Ceyranları qoruyaq” adlı ekoloji yay düşərgələri təşkil ediləcək. Respublika Uşaq-Gənclər İnkişaf Mərkəzi tərəfindən "Cücələrimin qonağı olaq” Art-düşərgə, Quba rayonunda ekoloji düşərgənin təşkili nəzərdə tutulur. Nazirliyin əməkdaşları üçün təşkil edilən və adıçəkilən düşərgələr ödənişsiz əsaslarla təşkil ediləcək. Respublika Uşaq-Gənclər İnkişaf mərkəzi tərəfindən təşkil edilən düşərgəyə mərkəzin fəal dərnək üzvləri cəlb edilir. Lerik, İsmayıllı və Qax rayonlarında təşkil olunan düşərgələr İDEA İctimai Birliyinin dəstəyi ilə keçirilir. Düşərgə 3 gün müddətindədir və həmin düşərgəyə yerli və qonşu rayonların təhsildə və ictimai işlərdə fəal məktəblilər cəlb olunurlar. Quba rayonunda təşkil edilən ekoloji yay düşərgəsinə Ekoklub üzvləri, "Cücələrimin qonağı olaq” adlı Art-düşərgəyə mərkəzin fəal dərnək üzvləri cəlb olunacaq. Hər iki düşərgə 7 gün nəzərdə tutulub”.

Bəs Sumqayıt Təhsil şöbəsində nə deyirlər?

Məsələ ilə bağlı sorğumuza cavab olaraq Sumqayıt şəhər Təhsil Şöbəsindən bildirilib ki, hazırda şəhərdə fəaliyyət göstərən ümumtəhsil məktəblərində yay düşərgələrinin təşkili nəzərdə tutulmayıb.

Sumqayıtda fəaliyyət göstərən tədris mərkəzlərində isə vəziyyət aşağıdakı kimidir:

"AVEY Tədris Mərkəzi” – Yay düşərgəsinin təşkili nəzərdə tutulmayıb

"Reduco Tədris Mərkəzi” - Yay düşərgəsinin təşkili nəzərdə tutulmayıb

"Hədəf” kursları – 1-7 iyul tarixində bir həftəlik Quba turu təşkil olunub

"Lider” kursları - Yay düşərgəsinin təşkili nəzərdə tutulmayıb

"Zirvə” kursları - Yay düşərgəsinin təşkili nəzərdə tutulmayıb

"Kaspi Təhsil Mərkəzi” – İyun ayının 20-dən avqust ayının 1-nə qədər 6 həftəlik Sumqayıt, Novxanı ətrafı və Bakı turu təşkil olunub.

Elnarə Salamova

Xeberle.com