"Gözlər çox həssas orqan
olduğundan hər fəsildə müxtəlif xarici mühit amillərinin təsirindən fərqli
patoloji dəyişikliklər müşahidə oluna bilər. Belə ki, qış aylarında əsasən kəskin
respirator virus infeksiyasının fonunda gözdə ikincili bakterial və virus mənşəli prosseslər inkişaf edir. Havalar
isindikcə, günəş şüalarının aktivliyi artdıqca və xüsusən də çimərlik mövsümü
başladıqdan sonra pasientlər həm allergik, həm də iltihabi mənşəli göz xəstəlikləri
ilə həkimə müraciət etməyə başlayırlar”.
Bu sözləri Xeberle.com-a açıqlamasında oftolmoloq Emin
Əlihüseynli bildirib. Onun sözlərinə görə, allergik konyunktivitlər zamanı
pasientlər gözlərin qızarması, qaşınması və selikli ifrazat şikayətləri ilə
müraciət edirlər: "Virus və bakterial konyunktivitlər zamanı isə şikayətlər
daha ağır olur. Bu zaman gözdə irinli, və ya irinli-selikli ifrazat, kəskin
qızarma, yad cism hissiyyatı və şişkinlik pasientləri narahat edir. Qeyd
etdiyim simptomlar adətən çimərlikdən qayıtdıqdan 1-2 gün sonra inkişaf etməyə
başlayır. İlkin
yardım kimi gözdən ifraz olunan seliyin və ya irinin ilıq su ilə təmizlənməsi və
gözətrafı nahiyyənin gigiyenası məsləhət görülür. Ancaq hər bir patoloji vəziyyət
üçün dəqiq müalicənin təyin edilməsi və simptomların daha da ağırlaşdırılmaması
üçün təbii ki, vaxt itirmədən göz həkiminə müraciət etməyi məsləhət görürük”.
E.Əlihüseynli
övladlarını qorumaları üçün valideynlərə diqqətli olmalarını tövsiyə
etdi:
"Çimərlikdə infeksion və allergik prosseslərin
inkişafına səbəb yaradan bir sıra xarici mühit amilləri mövcuddur. Burada dəniz
suyu və qum infeksiya mənbəyi ola bilər. Ona görə də ilk növbədə çimərliyin
seçiminə fikir vermək lazımdır. Təmiz və səliqəli çimərliklərə üstünlük verilməlidir.
Gün eynəyindən istifadə etmək məsləhətdir. Bəzən uşaqlar suyun altında gözlərini
açmağı çox sevirlər, bu halda xüsusi sualtı eynəklərdən istifadə olunmalıdır.
Uşaqlar həmçinin dəniz qumu ilə oynamağı da çox sevir və çirkli əlləri ilə gözlərini
ovuşduraraq, gözə mikrob salırlar. Qumla oynayan zaman gözə qum tökülməməli,
töküldüyü halda gözlər təmiz su ilə yuyulmalıdır. Təbii ki, əllərin təmiz yuyulması
da əsas profilaktik tədbirlərdəndir”.
Elnarə Salamova
Xeberle.com
Xəbərdən istifadə edərkən istinad etmək vacibdir.
