Son illər şirkətlər, mağazalar müştərilərini artırmaq və daha çox tanınmaq üçün sosial şəbəkələrə axın edirlər. Bununla yanaşı heç bir mağaza sahibi olmadan sosial media vasitəsilə əşyaların, ərzaqların və s. onlayn satışını həyata keçirənlər az deyil. Hətta "İnstagram”, "Facebook” və s. kimi şəbəkələrdə xüsusi hesab açaraq tortların, şirniyyatların satışı ilə də məşğul olanlar var. Bəs onların keyfiyyətinə kim zəmanət verir? Bu barədə Xeberle.com-a açıqlama verən Azad İstehlakçılar Birliyinin sədri Eyyub Hüseynov bildirdi ki, sosial şəbəkələr vasitəsilə satılan mallar çox təhlükəlidir:

 

"Bizə daim tortlardan, şirniyyatlardan şikayətlər edilsə də, sosial şəbəkələrdə satılan tort və ya şirniyyatlarla bağlı şikayət daxil olmayıb. Ümumiyyətlə sosial şəbəkələr vasitəsilə satılan mallar çox təhlükəlidir. Bu gün elektron ticarətlə klassik ticarət bazarda mübarizə aparır. İstehlakçı hüquqlarını qoruyan beynəlxalq təşkilatın məlumatına görə, internet üzərindən satılan dərmanların təxminən 70 faizi saxtadır. Online satılan mallar içərisində xüsusilə mobil telefonlardan bizə daha çox şikayət daxil olur. Tortlardan şikayət daxil olmasa da, bu mallar təhlükəli ola bilər. Çünki tortların saxlanılma müddəti 36 saatdan artıq deyil. Ona görə də mal alan zaman onun buraxılma və son istifadə tarixinə istinad etmək lazımdır”.