Bəzi iri və orta müssisələrin bağlanması, bir sıra yerdə aparılan ixtisarlar işsizlərin sayının artmasına öz təsirini göstərib. İşsizlikdən nəinki orta və yaşlı nəsil, hətta gənclər də əziyyət çəkir. Hətta bir çox hallarda işsizlikdən yaranan tələbatlar xoşəgəlməz və arzuolunmaz hadisələrin baş verməsinə səbəb olur.

 Bəs görəsən, Sumqayıtda bu yöndə vəziyyət necədir?

Sumqayıt şəhər Məşğulluq Mərkəzi işsizlərə, habelə vətəndaşlara münasib iş yerlərinin axtarılmasında, işəgötürənlərə lazımi kadrların seçilməsində, gənclərin peşə seçiminə köməklik məqsədilə hansı işləri görüb?

Qısası, Sumqayıtda hansı işlər daha çox arzu olunur?

Məsələ ilə bağlı Xeberle.com-a açıqlama verən Sumqayıt Şəhər Məşğulluq Mərkəzinin baş məsləhətçisi Etibar Səmədli işsiz və işaxtaran vətəndaşların sosial müdafiəsinin gücləndirilməsi, onların münasib işlərlə təminatı istiqamətində Məşğulluq Mərkəzi tərəfindən aktiv məşğulluq tədbirlərinin həyata keçirildiyini bildirdi. Sumqayıtın müasir sənaye şəhəri kimi bu gün ölkəmizin sənaye potensialının inkişafında mühüm rol oynadığını vurğulayan E.Səmədli iş axtaran vətəndaşların əksəriyyətinin fabrik və zavodlarda çalışması üçün müraciət etdiklərini söylədi: «Müraciət edən gənclərin əksəriyyəti isə mühafizə xidmətində işləmək istəyirlər. Eləcə də şəhərimizdə fəaliyyət göstərən iri dövlət və özəl müəssisələr, xarici şirkətlərdə də işləmək arzusunda olanlar az deyil. Həm iqtisadi, həm də sosial sahədə aparılan məqsədyönlü işlər nəticəsində ölkəmizdə işsizliyin səviyyəsi kəskin şəkildə aşağı düşməkdədir. Ölkənin sosial-iqtisadi inkişafı əhalinin məşğulluq imkanlarını daha da genişləndirir.

Məşğulluq Mərkəzimiz bu imkanlardan istifadə edərək, işsiz və işaxtaran vətəndaşların sosial müdafiəsinin gücləndirilməsi, onların münasib iş yerləri ilə təmin olunması istiqamətində tədbirlərini davam etdirir».

 

 

Xeberle.com