"Sumqayıt kimi böyük şəhərdə nə fərli meydançalar var, nə də idman üçün pulsuz qurğular. Şəhərdə müəyyən abadlıq işləri görülsə də, yollar, mərkəzdə, görünən yerlərdə,yolların kənarında olan yaşayış binalarının fasadları dəyişdirilsə də ,bəzi binaların damları təmir olunsa da, 400 mindən çox əhalisi olan böyük şəhərdə uşaqların oynaması üçün meydançalar, insanların sağlam həyat tərzini sürməsi üçün ictimai, pulsuz idman qurğuları salınmır,quraşdırılmır, daha doğrusu yoxdur”.

Xeberle.com xəbər verir ki,bu sözləri Bizimyol.info-ya Malik Həsənov adlı Sumqayıt sakini bildirib.

 

Onun sözlərinə görə, şəhərin heç bir ərazisində pulsuz "Wi-Fi” yoxdur:
"Hətta ümumi sahəsi 106 hektar, uzunluğu 4,2 kilometr olan Sumqayıt bulvarında belə (Nəsimi adına Dənizkənarı Mədəniyyət və İstirahət Parkı da bulvarın əsas hissələrindən birini təşkil edir) uşaqların əylənməsi, böyüklərin idman edə bilməsi üçün kiçik bir şeyi nəzərə almasaq heç bir şərait yaradılmayıb.21-ci əsrdə nə Sumqayıt Bulvarında, nə də ki, Nəsimi parkında və ya şəhərin heç bir yerində pulsuz "Wi-Fi” olan ərazi yoxdur”.

Məsələ ilə bağlı Sumqayıt şəhər İcra Hakimiyyətinin mətbuat katibi Eyvaz Qocayev ilə əlaqə saxladıq. E.Qocayev son zamanlar şəhərdə həyata keçirilən işlərdən danışdı və park ərazilərində isə yaxın zamanlarda pulsuz "Wİ-Fİ” –ın quraşdırılacağını bildirdi:
" Son illər Sumqayıtda abadlıq-quruculuq işləri, sakinlərin asudə vaxtının səmərəli təşkili üçün genişmiqyaslı layihələr həyata keçirilir. Yeni park və xiyabanlar salınır, əsaslı təmirə ehtiyac duyulan parklarda təmir bərpa işləri aparılır. Sözügedən məsələ ilə bağlı deyə bilərəm ki, bunun üçün şəhərimizdə nümunəvi məhəllələr salınıb, mövcud parklar yenilənib, bulvar ərazisində sakinlərin yaxşı istirahət edə bilmələri üçün hər cür şərait yaradılıb. Hazırda mərhələli şəkildə uşaqlar üçün bütün məhəllələrdə uşaq əyləncə meydançaları salınır. Bu yaxınlarda Nəsimi adına Mədəniyyət və İstirahət Parkında da sakinlərin rahatlığını təmin etmək üçün işlər həyata keçirilib. Parkda idman meydançasının və qurğularının yerləşdiyi ərazi əsaslı təmir olunaraq şəhər sakinlərinin ixtiyarına verilib. Meydançada şəhər sakinlərinin sərbəst şəkildə istifadə edə bilmələri üçün müxtəlif sayda idman qurğuları yerləşdirilib. "Wİ-Fİ” məsələsinə gəldikdə isə, deyə bilərəm ki, hazırda bütün iaşə obyektləri, restoranlar, istirahət mərkəzləri sakinləri pulsuz internet ilə təmin edir. Park ərazilərində isə yaxın zamanlarda pulsuz "Wİ-Fİ” –ın quraşdırılması planlaşdırılır. Həmçinin Nəqliyyat, Rabitə və Yüksək Texnologiyalar Nazirliyinin Sumqayıt Telekominikasiya Qovşağı tərəfindən bulvar ərazisinin internetlə təchiz olunması üçün nəzərdə tutulmuş yeni layihə həyata keçiriləcək. Sumqayıt sakinləri və şəhərə gələn qonaqlar Dənizkənarı bulvar ərazisində pulsuz internetdən istifadə edə biləcəklər”.