Yol hərəkəti qaydalarını pozmaya görə təkcə sürücülərə yox, piyadalara, sərnişinlərə, velosipedçilərə və mal-qara ötürən şəxslərə də cərimə tətbiq olunur. Çox zaman piyadalar yollarda məsuliyyətsizlik edir, yolun qadağan edilmiş hissələrinə çıxır, bəzən keçidin yaxınlığından yola daxil olur, avtobanlardan yolu keçməyə cəhd edir, işıqforun nizamlayıcı işarələrinə fikir vermir. Polis inzibati cərimə tətbiq etdiyi zaman isə əksər piyadalar cəriməni ödəməkdən imtina edir, polisin tətbiq etdiyi cərimə ilə razılaşmaq istəmirlər. Piyada unudur ki, o, ancaq qanunla nəzərdə tutulmuş keçidlərdən, zolaqlardan keçməlidir.

Sumqayıt şəhərində son bir il ərzində neçə piyadanın qanun pozuntusuna yol verdiyi və cərimə olunması , hansı marifləndirmə tədbirlərinin aparıldığı haqda məlumat almaq istəsək də Sumqayıt şəhər Dövlət Yol Polisi şöbəsinin təbliğat inspektoru İsmayıl İsmayılov Xeberle.com-a bu haqda dəqiq məlumatı olmadığını bildirdi.

Onu da nəzərinizə çatdıraq ki, piyadaların qanunvericiliklə tətbiq olunmuş cərimələri ödəməməsi ilə bağlı müvafiq sərtləşdirilmələr nəzərdə tutulub, müəyyən təkliflər irəli sürülüb. Belə ki, 20 manatlıq cərimə ödənilmədiyi təqdirdə məbləğ artır və sonradan məcburi icra yolu ilə vətəndaşın hansısa əmlakına həbs qoyulur.