O, Xeberle.com-a narahatçılığının səbəbini açıqlayıb: "Hazırda 14 saylı məktəbin rus dili bölməsində 2 birinci sinif var. Əslində isə 1 sinif olmalıdır. Uşaq sayı çox olduğuna görə ikinci sinif də açılıb. Onlayn sənəd qəbulu zamanı övladımı Nataliya müəllimənin tədris apardığı sinifdə qeydiyyata aldılar. Sıxlıq yarananda ikinci sinif açdılar. Əlavə sinif açılanda isə övladım sənəd qəbulu zamanı qeyd etdiyimiz Nataliya müəllimənin sinfinə deyil, əlavə açılmış Nailə müəllimənin sinfində qalası oldu.Düşündük ki, hər halda belə məsləhət imiş. Lakin əlavə olaraq açılan və övladım Əlinin də təhsil aldığı sinif bağlandı. Biz valideynlər yığışaraq məktəbin direktoru Xanım Həsənovaya müraciət etdik və sinif müvəqqəti olaraq bərpa edildi. Bizi narahat edən əsas məqam sinfin – övladımızın təhsilinin gələcək taleyi ilə bağlıdır. Sinif müvəqqəti bərpa olunub, bəs sabah necə olacaq? Bax bunu bilmirik”.

Mövcud müraciəti araşdırmaq üçün 14 nömrəli məktəbin direktoru Xanım Həsənova ilə əlaqə saxladıq. Direktor məsələni Xeberle.com-a belə izah etdi: "Nazirliyin qərarına əsasən yeni tədris ilində rus dili bölməsində açılacaq sinifdə Nataliya Zeynalova tədris aparmalıydı. Amma, o nazirliyə yazdığı ərizəylə həmin sinifdən imtina etdi. Nailə Arazovaya gəldikdə isə o, ötənilki məktəbəhazırlıq qrupundan şagirdlər çox olduğuna görə həmin sinifdə də hazırda özü dərs deyir. Hamısı da onlayn qaydada qeydiyyatdan keçən uşaqlardır. Heç kəsin də həmin sinfi bağlamağa ixtiyarı yoxdur. Xanım müəllimə nə sinif açır, nə də sinif bağlayır. Qərarlar Təhsil Nazilriyi tərəfindən verilir. Sinfin bağlanmaq ehtimalı da yoxdur. Sadəcə anlaşılmazlıq olub. Mən hər il iki yeni sinif açırdım, lakin bu il icazə verilməyib. Amma bu o demək deyil ki, onlayn qaydada qeydiyyatdan keçərək hazırda birinci sinfdə təhsil alan şagirdlər havada qalacaq. Hazırda məktəbdə rus dili bölməsi üzrə iki sinif fəaliyyətdədir, uşaqlar da təhsillərinə davam edirlər. Lakin bir sinif Təhsil nazirliyinin özünün açdığı, digəri isə onlayn qaydada sənəd verən uşaqlardan ibarət sinifdir. Sinfin nazirlikdə təsdiq olunması üçün müraciət etmişik, bütün distansiyalardan da keçib. Sadəcə qalıb təsdiq qərarı Bu da yəqin ki, yaxın vaxtlarda həllini tapacaq. Nazirlik özü gəlib sinfi yoxlayıb, həmin sinifdə təhsil alan uşaqlar rus dilində sərbəst danışırlar. Bir daha qeyd edirəm ki, valideynlərin narahatçılığına da heç bir əsas yoxdur" .

Xədicə Səxavətqızı

Xeberle.com