Bunları Xeberle.com-a Sumqayıt məhkəmələrinə olunan müraciətlər barədə danışarkən hüquqşünas Ramil Süleymanov bildirib. O, həmçinin söyləyib ki, günümüzdə nəinki Sumqayıt, habelə ümumilikdə respublika üzrə məhkəmələrə edilən şikayətlər arasında ailə məişət problemləri üstünlük təşkil edir. Daha sonrakı sıralarda aliment tələbləri, əmlak məsələləri durur. "Son illərdə isə bank kredit mübahisələri ciddi şəkildə artıb. Vətəndaşların banklara olan borclarını ödəyə bilməməsi və kreditorə təşkilatlarla vətəndaşlar arasında yaranan anlaşılmazlıqlar məhkəmələrə qədər gəlib çıxır. Son aylarda bu müraciət üzrə azalma müşahidə edilsə də, icra məmurlarının məhkəmə qərarlarını icra etməkdə hələ də ciddi narahatlıqları var. İcra olunmamış məhkəmə qərarları icraçıların masalarında bu gün də qalaq qalaqdır.

Cinayət işləri üzrə isə 177, 177.1 maddələri, yəni oğurluq məsələri üstünlüyünü qoruyur. Daha sonrakı mərhələdə isə həmişə olduğu kimi narkotik vasitələrin istifadəsi və satışı, avtoqəzalar və sair gəlir", - deyə R.Süleymanov deyib. Hüquqşünas onu da qeyd edib ki, məhkəmələrə müraciətlər sırasında məişət zorakılıqları ilə bağlı şikayətlər də az deyil: "Təəssüf ki, istər məişət zorakılığı, istərsə də ailə problemləri olsun - belə hallarda əziyyət çəkən daha çox uşaqlar olur. Problemlə mübarizə üçün qanunvericilik sahəsində zəruri addımlar atılıb. Milli Məclis (MM) 2010-cu ildə "Məişət zorakılığının qarşısının alınması haqqında” Qanun qəbul edib. Ancaq rəsmi statistikadan ortaya çıxan nəticəyə görə, bu sahədə hələ çox iş görülməlidir".

Xatırladaq ki, Ailə, Qadın və Uşaq Problemləri üzrə Dövlət Komitəsinin son 4 illə bağlı statistikası da sübut edir ki, məişət zorakılığı artan tendensiya ilə gedir.

Göründüyü kimi, məişət zorakılığı hazırda ciddi sosial problemdir.