Sumqayıtın tanınmış iş adamlarından biri, "Sumqayıt-çörək” ASC-nin direktoru Əlfüqar Qasımov "Zolotoy manqust” medalı ilə təltif olunub. Mükafatı ona sərbəst güləş üzrə Azərbaycanın və keçmiş ittifaqın Əməkdar İdman Ustası, Azərbaycanın Əməkdar Məşqçisi, SSRİ və Avropa çempionatlarının dəfələrlə qalibi və mükafatçısı olmuş, veteranlar arasında sərbəst güləş üzrə dünya çempionu Oleq Krapivin təqdim edib. Şəhərin ağsaqqallarından olan Ə.Qasımov bu medala gənc idmançılara göstərdiyi diqqət və qayğı sayəsində layiq görülüb. Qeyd edək ki, təmiz qızıldan hazırlanan və üç ədəd brilyant qaşla bəzədilən "Zolotoy manqust” medalı idmançıların zəhmət və nailiyyətlərini, habelə idmanın inkişafına töhfə verən veteranların, siyasətçilərin və xeyriyyəçilərin fəaliyyətini qiymətləndirən mükafatdır.
İş adamı medala görə O.Krapivinə minnətdarlığını bildirib və ona Ukrayna Respublikasındakı fəaliyyətində, habelə dost xalqlar arasında olan idman və mədəni münasibətlərin inkişafında göstərdiyi təşəbbüslərdə uğurlar diləyib. Xatırladaq ki, Şamaxıda doğulan, sonradan Bakının Sabunçu rayonunda yaşayan O.Krapivin illər öncə Ukrayna Respublikasına köçüb və hazırda orada yaşayır. Veteran idmançı və iş adamı Ukraynada keçirilən ümummilli lideri Heydər Əliyevin xatirəsinə həsr edilən yeniyetmələr və qızlar arasında sərbəst güləş üzrə ənənəvi beynəlxalq turnirin banisi və baş sponsorudur. O, həmçinin Ukraynada fəaliyyət göstərən "Azərbaycançılıq İnstitutu” beynəlxalq ictimai təşkilatının prezidenti, Ukrayna Azərbaycanlıları Konqresinin Kiyev şəhər təşkilatının sədridir.
Xeberle.com
Xəbərdən istifadə edərkən istinad etmək vacibdir.
