Azərbaycanın ədəbi-mədəni fikir tarixinin bu əlamətdar hadisəsinin dövlət səviyyəsində təşkil edilməsi məqsədilə "Böyük Azərbaycan şairi İmadəddin Nəsiminin 650 illik yubileyinin qeyd edilməsi haqqında” ölkə başçısının müvafiq sərəncamı ilə Nazirlər Kabinetinə müvafiq tədbirlər planının hazırlanıb həyata keçirilməsi tapşırılıb.

Bəs Sumqayıtda İmadəddin Nəsimini xatırladan nələr var?

Xeberle.com olaraq bununla bağlı kiçik bir araşdırma apardıq.

Məlum oldu ki, Sumqayıtda dahi Azərbaycan şairini xatırladacaq yalnız bir məkana rast gəlmək olar ki, o da Nəsimi adına İstirahət və Mədəniyyət Parkıdır.

Mədəniyyət və istirahət parkı 1967-ci ildə Azərbaycan SSR Mədəniyyət nazirliyinin 16 mart tarixli 64 saylı əmrinə əsasən yaradılıb. Parka 17 avqust 1978-ci ildə dahi Azərbaycan şairi İmadəddin Nəsiminin adı verilib.

Nəsimi adına mədəniyyət və istirahət parkı yaz-yay mövsümündə mədəni-kütləvi tədbirlərin keçirilməsi üçün əsas mərkəzdir. Azərbaycan rəssamlarının əsərlərindən ibarət sərgilərin nümayişi, şair və yazıçılarla görüşlərin təşkili, əmək, ədəbiyyat və incəsənət günləri ilə əlaqədar keçirilən ənənəvi tədbirlərin əsas ünvanı məhz İ.Nəsimi adına mədəniyyət və istirahət parkıdır.

Parkın giriş hissəsinin qarşısında 2003-cü ildə o vaxtlar şəhərin baş rəssamı Vaqif Nəzirov, rəssam Aqil Quliyevlə birgə müəllifliyi ilə İ. Nəsiminin abidəsi qoyulub.

Sumqayıtın əsas magistral yolu olan Səməd Vurğun küçəsindən tutmuş Xəzərin ləpədöyəninə qədər ərazini əhatə edən parkın hazırda ümumi sahəsi 80 hektardır.

Azərbaycan Respublikası Nazirlər Kabinetinin 02.08.2001-ci il tarixli 132 saylı qərarına əsasən, İ.Nəsimi adına mədəniyyət və istirahət parkı ölkə əhəmiyyətli tarix və mədəniyyət abidələri siyahısına daxil edilib.

Xədicə Səxavətqızı

Xeberle.com