15 oktyabr 1998-ci ildə yaradılan özəl "Dünya" Müstəqil Televiziya və Radio Şirkəti, 1999-cu ilin noyabrından fəaliyyətə baslayıb. Gün ərzində 16 saat yayımlanan TV kanal Milli Televiziya və Radio Şurasının 15 sentyabr 2005-ci il tarixli qərarı ilə "Dünya" Müstəqil Televiziya və Radio Şirkətinin televiziya yayımı ücün lisenziya alıb.

Nəzərə alsaq ki, Sumqayıtda qeyri-rəsmi olaraq təxminən yarım milyona qədər sakin yaşayır, təbii olaraq bir sual yaranır: - Sumqayıtın ikinci bir telekanala ehtiyacı varmı?

Televiziya mütəxəssisi, professor Qulu Məhərrəmli deyir ki, ümumilikdə yalnız Sumqayıt şəhərində yox, Azərbaycanın iri şəhərlərində yerli həyatı işıqlandıran televeziya kanallarına, yerli qəzetlərə, saytlara ehtiyac var:

"Lakin problem ondadır ki, mərkəzdə də çox sayda televiziya kanalı var. Sayı kifayət qədər çox olan kanallar bir birindən heç nə ilə fərqlənmirlər. Yeni kanal açılırsa, o, mütləq özündən əvvəlkilərdən fərqlənməlidir. Sumqayıt əhalisi fəaliyyətdə olan yerli televiziya kanalından şəhəri haqqında nə dərəcədə dolğun məlumat ala bilir? Hər vilayətin qəzeti, televiziyası həmin vilayətin güzgüsü olmalıdır. Şəhərdə gedən proseslərdən şəhər əhalisi tam dolğun məlumatları yerli kanaldan öyrənməlidir. Sumqayıtda da həmçinin- yalnız musiqili-əyləncəli proqramlar yox, dinamik şəhərimiz olan Sumqayıtda baş verən bütün hadisələrlə, gənclərlə, işsizliklə bağlı olan problemləri işıqlandıracaq kanala ehtiyac var.

Ssenarist, redaktor Hafiz İmamnəzərli isə fərqli düşünür və yeni televiziya kanalının yaradılmasına ehtiyac olmadığını bildirir.

"Mən düşünürəm ki, ikinci bir televiziya kanalına ehtiyac yoxdur. Hazırda var olan tv kanalın üzərində işləmək, peşəkarları cəlb etmək lazımdır. Son vaxtlar Sumqayıtın televiziya kanalının xəbərlər departamenti inkşafa doğru gedir, irəliləyişlər var. Hazırda çox sayda tv kanal, sayt var, zənnimcə yenisini yaratmaq əvəzinə olan kanalda peşəkarları bir yerə cəmləyib inkşaf etdirmək lazımdır”.

"Sumqayıt kimi gözəl və gənc bir şəhərin könül oxşayan televiziyası yoxdur” –Telejurnalist Aidə Eyvazlı.

A.Eyvazlı da Sumqayıt şəhərinin telekanalından narazı olduğunu söyləyib: "Sumqayıt nə qədər böyüsə də, hamının yaddaşında , fikrində "Gənclər şəhəri” kimi formalaşıb. Son illərdə şəhərimizdə gedən quruculuq işləri, onu deməyə əsas verir ki, Sumqayıt elə gəncdir. Bu gənc şəhərdə doğulanlar respublikamızın və şəhərimizin çiçəklənməsində, ölkəmizin inkişafında hər zaman birinci olublar. Əfsuslar olsun ki, belə gözəl və gənc bir şəhərin könül oxşayan televiziyası yoxdur.Sumqayıt və sumqayıtlılar çox ilklərə imza atıblar. Dünyanın hər yerində yaşayan, yaradan sumqayıtlılardan hər gün verilişlər hazırlansa belə, 10 il də yetməz. Sumqayıtda bir televiziya var. Lakin bu məlum televiziya ancaq üzdəniraq musiqiçilərə, toy tutmaq istəyən ara müğənnilərinə hesablanıb. Televiziyadan daha çox alverxana, rüşvət yuvası olan həmin televiziya təbii ki, şəhərin sakinlərinə və tamaşaçılarına dakönül oxşayan heç nə verə bilmir. Çox yaxşı olardı ki, şəhərimizdəki istedadlı və yaradıcı jurnalistlər, televiziya mütəxəssisləri bir araya gələrək STV adlı bir televiziya yaratsınlar. Yeni nanotexnologiyalar və yeni peşəkar işçi qüvvəsi ilə belə bir televiziya yaranarsa, fəaliyyət göstərərsə, inanın ki, həm də Vətənimiz qazanar. Son illərdə ölkədə fəaliyyət göstərən televiziyaların çoxunda ancaq şou məclisləri qurulur. Lakin unutmaq olmaz ki, bizim çox dəyərli ziyalılarımız, tamaçaşılarımız var ki, onlar kitablar, dram əsərləri, əfsanəvi kinolar, həyat həqiqətləri, tariximiz, mədəniyyətimiz haqqında dəyərli televiziya verilişlərinə baaxmaq arzusundadırlar. Çox istərdim ki, belə bir TV yaransın və mən də təcrübəli bir jurnalist və televiziyonçu kimi öz köməyimi əsirgəmərəm”.

Əməkdar jurnalist Rəhman Orxan da Sumqayıtda əlavə TV kanalına ehtiyac görməyənlərin cərgəsindədir.

R.Orxan həmçinin bildirib ki, "Dünya" TV bu gün hətta rayonlarımızda belə ən çox məşhurluq qazanmış kanaldır. Nə vaxt rayona yolum düşürsə, mənə çox qəribə gəlsə də, görürəm ki, qohumlarımız bir evdə, o biri evdə - hamısı çox vaxt DTV-yə baxırlar. Düzü, bunu görəndə, eşidəndə çox sevinirəm. Hər halda DTV bizə "bir köynək" yaxın olan, doğma telekanaldır. Bəli, danmaq olmaz: burda təcrübəli aparıcılarla yanaşı, bir az naşı olan, bu və ya digər verilıişi zəif, sönük aparan da var. Ancaq bütünlükdə DTV tamaşaçılar tərəfindən maraqla baxılır. Son illərdə hətta paytaxtda yaşayan sənət adamları, görkəmli şəxslər, şairlər, yazıçılar, aktyorlar, eləcə də respublikamızın müxtəlif rayonlarından olan ziyalılar, iş-güc adamları da DTV-nin təşkil etdikləri verilişlərdə həvəslə iştirak edirlər. Şəhər və rayonlarımızdan hazırlanan, xüsusilə də DTV-nin Rusiya, Ukrayna və digər MDB ölkələri üzrə müxbirlərinin canlı olaraq təşkil etdikləri TV görüşləri, diasporamız barədə, o cümlədən həmvətənlərimizin həmin ölkələrdə fəaliyyəti və yaşayışı ilə bağlı telesüjetlər çox maraqla qarşılanır. Odur ki, mən Sumqayıtda ikinci bir TV kanalının açılışına ehtiyac olmadığını düşünürəm. Milyonlarla manat əlavə xərc çəkib, əlavə TV kanalı yaratmaqdansa həmin xərclərin heç olmasa yarısını DTV-yə yönəltməyivə onu geniçləndirməyi daha vacib və daha münasib hesab edirəm.

Şəhər sakinləri arasında sosial şəbəkədə apardığımız sorğunun nəticələri çoxluğun Sumqayıtın tv kanalından narazı olduğu fikrinin formalaşmasına əsas verir. İkinci bir televiziya kanalı da yaranacaqsa, o da birincinin təkrarı olacaq deyə düşünənlər də az deyil.

Ümumilikdə isə çoxluq marifləndirici verilişlərin olmasını və şəhərin aktiv həyatını özündə əks etdirən verilişlərin sayının artmasını arzu edir.

Qeyd edək ki, şəhər əhalisi arasında keçirilən sorğuda, ümumiyyətlə hazırda fəaliyyətdə olan televiziyanın bağlanılması kimi istəyini dilə gətirənlər də olub.

Xədicə Səxavətqızı

Xeberle.com