Dövlət İmtahan Mərkəzinin məlumatına görə, bu il ali təhsil müəssisələrinin müsabiqəsində 44772 abituriyent iştirak edib. Onlardan 39906 nəfəri ali təhsil müəssisələrinə qəbul olunub. 11963 nəfər dövlət sifarişi əsasında, 27943 nəfər isə ödənişli əsaslarla təhsil almaq hüququ əldə edib.

Bundan əlavə, 61 abituriyent idman sahəsi üzrə, 5 abituriyent isə incəsənət sahəsi üzrə yüksək səviyyəli beynəlxalq yarışların və müsabiqələrin qalibi olduğu üçün bakalavriatura səviyyəsinin müvafiq ixtisaslarına müsabiqədənkənar qəbul olunub.

Builki qəbul zamanı ali məktəb tələbəsi adı qazanmış bir çox gənc dövlət universitetlərinin ödənişli ixtisasına qəbul olunsalar da, təhsil haqqı ödəməyəcəklər. Bəs ümumiyyətlə kimlər təhsil haqqından azad olunacaqlar?

Ali məktəbə qəbul olanları maraqlandıran suallardan biri də budur.

Xeberle.com-a açıqlama verən təhsil eksperti Kamran Əsədov bu məsələyə aydınlıq gətirib. Onun sözlərinə görə, aşağıdakı şəxslər təhsil haqqından azad olunacaqlar.

1. Azərbaycan Respublikasının Prezidentinin "Azərbaycan Respublikasının dövlət ali təhsil müəssisələrində ödənişli əsaslarla təhsil alan məcburi köçkünlərin təhsil xərclərinin ödənilməsi haqqında” 14 sentyabr 2011-ci il tarixli Sərəncamına əsasən məcburi köçkün statusu olan Azərbaycan Respublikası vətəndaşları təhsil müddəti ərzində təhsil haqqından azad edilirlər (Ancaq dövlət təhsil müəssisələrində).

2. Azərbaycan Respublikasının Prezidentinin "Azərbaycan Respublikasının ərazi bütövlüyünün, müstəqilliyinin və Konstitusiya quruluşunun müdafiəsi zamanı əlil olmuş və Azərbaycan Respublikasının azadlığı, suverenliyi və ərazi bütövlüyü uğrunda həlak olan, hərbi əməliyyatla əlaqədar itkin düşən və məhkəmə tərəfindən ölmüş elan edilən vətəndaşların uşaqlarının təhsil xərclərinin ödənilməsi haqqında” 18 mart 2014-cü il tarixli Sərəncamına əsasən həmin şəxslərin təhsil alan övladları təhsil müddəti ərzində təhsil haqqından azad edilirlər.

3. "Şəhid adının əbədiləşdirilməsi və şəhid ailələrinə edilən güzəştlər haqqında” 3 sentyabr 1993-cü il tarixli Azərbaycan Respublikasının Qanununa əsasən Şəhid ailəsi statusunu almış ailənin üzvləri təhsil müddəti ərzində təhsil haqqından azad edilirlər.

4. "Valideynlərini itirmiş və valideyn himayəsindən məhrum olmuş uşaqların sosial müdafiəsi haqqında” 22 iyun 1999-cu il tarixli Azərbaycan Respublikasının Qanununa əsasən

1. hər iki valideyni vəfat etmiş 18 yaşınadək olan şəxslər;

2. hər iki valideyn himayəsindən məhrum olmuş uşaqlar;

3. Bir valideyni vəfat etmiş və o biri valideyni I və II qrup əlil olan 18 yaşınadək şəxslər təhsil müddəti ərzində təhsil haqqından azad edilirlər.

Məsələnin daha çox diqqət çəkən tərəfi isə valideynlərindən birini itirmiş 18 yaşınadək olan şəxslərin digər valideynində əlil olması şərtidir. Ekspert bu məsələyə də aydınlıq gətirərək bildirdi ki, ötən illərə nisbətən ödənişli plan yerləri artıb və təhsildə müəyyən güzəştlər olmalıdır. Ən azından aztəminatlı, Dövlət Sosial Müdafiə Fondunda qeydiyyatda olan ailələr var ki, onlara güzəşt edilməlidir. Ünvanli sosial yardım alan və yaxud həqiqətən maddi imkanları zəif olan şəxslərərə güzəştlər olmalıdır. Təhsilin əlçatımlığı üçün, təhsilin əhatə dairəsinin genişlənməsi üçün bunlar vacibdir. Təhsildə güzəştlər

olunmalıdır. Qiymət almaq üçündeyil, təhsil almaq üçün güzəştlər daha çox olunmalıdır. Ölkə prezidentinin 2013-cü ildə imzaladığı təhsilin inkşafi ilə əlaqəli dövlət srategiyası var, orada təhsilin əlçatımlığı, təhsilin əhatə dairəsinin genişləndirilməsi, güzəştlər nəzərdə tutulub. Zaman-zaman da belə humanist addımların atılması gözləniləndir.

Xədicə Səxavətqızı

Xeberle.com