Sumqayıt şəhər 9-cu mikrorayon ev 12, 13 ünvanının sakinləri həyətlərində aparılan tikintidən narahatdırlar.
Sakinlər Xeberle.com-a şikayətlərində binalarının qarşısında, uşaqların oynadıqları və bina sakinlərinin asudə vaxtlarında oturub dincəldikləri boş olan ərazidə obyekt tikildiyini iddia edirlər: "Burada obyekt tikməyə başlayıblar. Özü də düz blokun qarşısında. Nə uşaqların oynamağa yeri, nə yaşıllığımız, nədə oturmağa yer qaldı”.
Sakinlər bildirirlər ki, dəfələrlə obyekt sahibi ilə də danışıqlar aparıblar. Ona vəziyyəti izah ediblər. Əvəzində isə belə bir cavab alıblar:"Tikinti aparmaq üçün bütün qanuni sənədlərə malikəm".
Bəs aidiyyati qurumlar nə deyir?
Məsələ ilə bağlı Sumqayıt şəhər Mənzil Kommunal Təsərrüfatı İstehsalat Birliyi ilə əlaqə saxladıq. Birliyin sözçüsü Xəqani Həşimov Xeberle.com-a açıqlamasında sakinlərin narahatlıqlarına əsas görmür: "Sözügedən ərazidə bərbərxana tikilir və bütün sənədləri də qaydasındadır. "Tikinti üçün rəsmi icazə də var. Obyekt inşa edilən əraziyə gəldikdə isə bu heç də sakinlərin qeyd etdiyi ərazidə aparılmır. İnşa işləri düz blokların qarşısında deyil, kənarda olan boş ərazidə aparılır".
Xədicə Səxavətqızı
Xeberle.com
Xəbərdən istifadə edərkən istinad etmək vacibdir.
