Xeberle.com xəbər verir ki, görüşdə şəhər ictimaiyyətinin tanınmış nümayəndələri və dairə ərazisində yaşayan seçicilər iştirak edib. Görüş 20 Yanvar şəhidlərinin xatirəsinin bir dəqiqəlik sükutla yad edilməsi ilə başlayıb. 

Namizədin vəkilləri çıxış edərək vurğulayıblar ki, bu günə qədər keçirilən bütün seçkilərdə partiyanın namizədlərinin qələbə qazanması, Azərbaycanın rifahı və quruculuğu naminə fəaliyyət göstərməsi xalqda partiyaya və onun parlamentdəki təmsilçilərinə böyük rəğbət qazandırıb.

Deputatlığa namizəd Müşfiq Məmmədli ilk olaraq göstərilən etimada görə Yeni Azərbaycan Partiyasınını rəhbərliyinə dərin minnətdarlığını bildirib. M. Məmmədli seçicilərə Yeni Azərbaycan Partiyasının seçki platforması və öz fəaliyyəti barədə ətraflı məlumat verib. O, qeyd edib ki, Azərbaycan ötən 16 ildə böyük nailiyyətlər qazanaraq dünyanın qabaqcıl ölkələri ilə bir sırada dayanır, beynəlxalq ictimaiyyət tərəfindən müstəqil, güclü və qüdrətli dövlət kimi qəbul olunur.

Deputatlığa namizəd son illər Sumqayıtda aparılan abadlıq-quruculuq işlərindən də söz açıb. O, çıxışında müəyyən problemlərin olduğunu və çatışmazlıqların aradan qaldırılacağı istiqamətində böyük səylə çalışacağını seçicilərin diqqətinə çatdırıb.

Görüş iştirakçıları isə seçicilərin 9 fevral parlament seçkilərində YAP-ın namizədi Müşfiq Məmmədliyə səs verəcəklərini bildirib və onun qalib gələcəyinə əminliklərini ifadə ediblər.

Qeyd edək ki, Müşfiq Məmmədli 1972-ci il avqustun 1-də Sumqayıtda anadan olub. 1989-cu ildə Sumqayıt şəhər 25 saylı tam orta məktəbi bitirib. 1989-cu ildən 1990-cı ilə qədər 1 saylı Kliniki Tibbi Mərkəzdə (Semaşko) sanitar işləyib. 1990-1996-cı illər ərzində Azərbaycan Tibb Universitetinin Pediatriya fakültəsində təhsil alıb. 1996-1997-ci illərdə Sumqayıt şəhər Uşaq Xəstəxanasında internatura keçib, 1997-1999-cu illərdə isə qəbul şöbəsinin həkimi vəzifəsində çalışıb. 2000-ci ildə 3 il müddətində Türkiyənin İstanbul şəhərində təhsil alıb. 2004-2006-cı illər ərzində Tərtər bölgəsində N saylı hərbi hissənin tibb məntəqəsinin həkimi, sonra isə rəisi olub. 2006-cı ildən 2014-cü ilə qədər Təcili Tibbi yardım stansiyasının, daha sonra isə Sumqayıt Uşaq xəstəxanasının həkimi işləyib. 2015-2016-cı illərdə Uşaq xəstəxanasının pediatriya şöbəsinin müdiri, 2016-cı ildən isə xəstəxananın baş həkimidir.

Qeyd edək ki, M.Məmmədli 2013-2015-ci illər ərzində Rusiyanın Sankt-Peterburq İqtisad Universitetinin Ali İqtisad Məktəbində MBA proqramı çərçivəsində "Səhiyyə təşkilatlarının menecmenti" ixtisasına da yiyələnib. 2016-cı ildən isə Rusiya Pediatrlar İttifaqının üzvüdür. Ailəlidir 3 övladı var.

2006-cı ildən Yeni Azərbaycan Partiyasının üzvüdür. 

Yeni Azərbaycan Partiyasının (YAP) 44 saylı Sumqayıt – Xızı seçki dairəsindən deputatlığa namizədidir.