Sakinlər bildiribləri ki, illərdir bu yataqxanada yaşayıblar və mənzillər üçün müxtəlif məbləğlərdə Mənzil istismar Sahəsinə pul ödəyiblər. Deyirlər ki, hazırda onlara 1 ay vaxt qoyulub və 15 ailə mənzillərdən çıxarılmaq təhlükəsi ilə üzləşiblər.

Məsələ ilə bağlı Sumqayıt şəhər İcra Hakimiyyəti Başçısının Hacı Zeynalabdin qəsəbəsi üzrə icra nümayəndəsi Lalə Hacıyeva ilə əlaqə saxladıq. L. Hacıyeva Xeberle.com-a açıqlamasında  həmin ünvanda yaşayan sakinlərin probleminin uzun illərdir davam etdiyini və bundan şəhər rəhbərliyinin də məlumatlı olduğunu bildirdi: "Oradakı binalar taxtadan tikilən baraklardır, hərbi şəhərcik hesab edilir və ərazi Müdafiə Nazirliyin tabeliyindədir. Əraziyə də nazirliyini Mənzil İstismar Sahəsi baxır, bizim ərazimiz deyil. Lakin mən icra nümayəndəsi olaraq ərazidə tez-tez oluram, onların vəziyyəti ilə yaxından tanış oluram. Hazırda bina çox acınacaqlı vəziyyətdədir, demək olar ki, bina uçur. Binanın istismar müddəti artıq bitib. Bina ya sökülməlidir, ya da yenidən qurulmalıdır. Fövqəladə hallar Nazirliiyinin nümayəndələri də binaya baxış keçirib. Sakinləri məhkəməyə veriblər və onlara binadan çıxmaq üçün 1 ay vaxt veriblər.

İcra nümayəndəsi onu da qeyd edib ki, ötən il həmin ərazidə yaşayan məcburi köçkünlər mənzillə təmin olunaraq oradan köçürülüblər: "Hazırda binada yaşayanlar yerli əhalidir.Onların vəziyyətləri çox acınacaqlıdır. Şəhər rəhbərliyi də vəziyyətlə tanışdır və onun icazəsi olmadan heç bir vətəndaşın evlərdən çıxarılmamasını bildirib. Çünki sakinlər evlə təmin olunmadan yaşadıqları ərazidən çıxarıla bilməzlər".

Xədicə Səxavətqızı

Xeberle.com