Sumqayıtda bu şadlıq evində təxminən 700 nəfərlik qonaq üçün təşkil edilən toy məclisi 35000 manata başa gəlir

Böyük biznes maraqlarını həyata keçirmək arzusunda olan bir çox iştahlı iş adamları üçün Sumqayıt kasıb şəhərdir. Amma, deyəsən, bunun əksini düşünən sahibkralar da var. Belə olmasaydı, şəhərdə bahalı, lüks məkanların - kafe, restoran, şadlıq sarayı, geyim butiki, parfüm mağazası, estetik mərkəz və sair kimi obyektlərin sayı gündən-günə artmazdı.

Müşahidələrimizə görə son illər Sumqayıtda açılan müxtəlif xidmət obyektlərinin böyük əksəriyyəti qiymətlərin yüksək olması ilə seçilir.

Sumqayıt sakinləri arasında müxtəlif üsullarlar (canlı, onlayn, telefon) aparılan sorğuda respondentlər tərəfindən "Zəfəran”, "Şeş beş”, "Moxito” kimi kafelər, "Forte”, "Turan”, "Park Restoran” "Amor” kimi restoranlar, "Xəlifə”, "Green House”, "Luxery Palace” şadlıq sarayı şəhərin ən bahalı məkanı kimi qeyd edilib. Bu sırada "New tone”, ”Sumqayıt” mebel evi, AZZA şirniyyat dükanı, ”Mem”, "Murassimo”, "Suvari”, "Lord” geyimləri butiki, "Scarlet”, "Egara” qadın salonları, ”Bəy hamamı”nı və "Karizma” kişi salonunu da qeyd etmək olar.

"Sumqayıt” mebel evində avanqard üslubunda ən ucuz yataq dəstinin qiyməti 9000 manat təşkil edir.

"Bəy hamamı”na getmək üçün bəy kimi zəngin olmaq lazımdır. Hamama gəlmək arzusunda olan nə az, nə də çox 50 manat ödəməlidir.

"AZZA cake house”da əsasən müxtəlif çeşiddə tortlar satılır. 1 kq tortun qiyməti növünə görə 25-35 manat arasındadır.

"Mem” qadın geyimləri dükanında təkcə bir çantanı hələ endirim qiymətilə 120 manata almaq olar.

"Park Restoran”da çay dəstgahı 15 AZN-dir.

"Amor”da isə çay dəstgahı almaq üçün 25 manatından keçməlisən.

"Zəfəran” kafedə 50 qəpiklik şüşə qabdakı "Sirab”ı orada 1,5 manata satırlar (bu barədə aşağıda daha geniş söz açacağam).

"İdeal” parfüm və kosmetika dükanları şəbəkəsi bütün respublikada olduğu kimi, Sumqayıtda da eyni – baha qiymətlərlə işləyir. Məsələn, 25-30 manatlıq ətirləri 90-100 manata satırlar.

Bahalı və lüks məkan kimi tanınan yerlərin qiymətinin yüksək olmasının səbəbini və fərqini öyrənmək istəyilə bir-neçə obyektə getməli olduq. Amma bir müştəri kimi yox.

"Uventa Beauty Palace”da ucuzlaşma, yoxsa endirim kampaniyası?

Sumqayıtın ən bahalı məkanları sırasında "Uventa Beauty Palace” xüsusi olaraq seçilir. Mərkəzdə xanımlar üçün aerobika - fitnes, gözəllik salonu, kosmetoloji mərkəz, SPA salonu, sauna və rəqs kursları var. Mərkəzdə xidmət qiymətləri təxminən belədir: məşhur türk hamamı 60-35 manat, aerobika - fitnes 40 manat, SPA salonunda sadə masaj 20, şokolad masajı 60 manatdır. Qeyd edək ki, qiymətlər haqqında müfəssəl məlumatı əldə etmək üçün "Uventa Beauty Palace”ın facebook səhifəsinə istinad etdik.

Amma mərkəzin inzibatçısı Hicran Murtuzovayla qiymətlərdən bəhs edərkən, xanım inzibatçı buna sərt reaksiya verdi: "Niyə hər kəs buranı bahalı hesab edir, bilmirəm?” Kənardan nədənsə hamı belə bilir. Kimsə maraqlanırsa, gəlsin mərkəzimizə, burda onlara dəqiq məlumat verək”.
H.Murtuzova "Uventa Beauty Palace”da qiymətlərin o qədərdə baha olmadığını bildirdi. SPA salonunda yalnız sadə masaj xidməti var. Bu xidmətin də qiyməti 20 manatdır. Türk hamamında qiymətlər bir nəfər üçün 18, iki nəfər bir yerdə gələrsə, adam başına 15 manatdır. İnzibatçı xanımın söhbətindən belə başa düşdük ki, "Uventa Beauty Palace”da artıq qiymətlər ucuzlaşıb. Mərkəzə gələn müştərilər də kifayət qədərdir.
Amma mərkəzin facebook səhifəsində "Uventa Beauty Palace”da noyabrın 11-dən, dekabrın 15-nə kimi endirim kampaniyası keçirildiyindən və qiymətlərə 50 % endirim olduğunundan bəhs edən elanlar var idi.

"Zəfəran” Sumqayıtın elit təbəqəsi üçündür

"Zəfəran” Sumqayıtın digər kafelərindən təkcə qiymətilərinə görə fərqlənmir. Kafenin menyusunda milli yeməklər olsa da, əsas üstünlüyü Avropa mətbəxinin təamları təşkil edir. İçkilərdən əsas yeri Avropa istehsalı olan müxtəlif çeşidli araq, şərab və kokteyllər tutur. Spirtsiz kokteylin qiyməti 5 manatdan başlayır. Menyuya nəzər salarkən "Sezar” salatının 6 manat, sac-içinin 12 manat, şef-aşpazdan özəl "Zəfəran” adlı yeməyin isə 15 manat olduğunu gördük. Kafenin inzibatçısı Aydın Abbasov "Zəfəran” kafesinin Sumqayıtın elit təbəqəsi, yəni iş adamları üçün nəzərdə tutulduğunu bildirdi.

Sadə sumqayıtlılar əcnəbi mətbəxinə nə qədər maraq göstərir?

"Art” kafe təkcə qiyməti ilə deyil, Sumqayıtda qeyri-adi menyusu ilə seçilən kafelərdən biridir. Kafedə sırf türk, rus və Avropa mətbəxinin yemək və məşhur desertləri üstünlük təşkil edir. İnsafən kafedə sakit və romantik ab-hava hökm sürür. İnzibatçı Elgün İbişovun dediyinə görə, müştəriləri kafenin menyusunda xarici mətbəxin yeməkləri olması maraqlandırır. Özü də kafeyə gələnlərin əksəriyyətini sadə sumqayıtlılar təşkil edir. Ağız dadını dəyişmək istəyənlər məhz "Art” kafeyə üz tuturlar. E.İbişov onu da bildirdi ki, Sumqayıta ilk dəfə bu menyunu onlar gətiriblər.
Xatırladaq ki, kafenin menyusunda rus mətbəxinin məşhur yeməyi "Bif stroqanov”, Avropa mətbəxindən "Shincel”, "Toyuq ağ çaxırda” kimi yeməklər var.

"Tom and Jerry”də balaca sumqayıtlılar istədikləri kimi əylənirlərmi?

Sumqayıtda bu vaxta qədər yeganə əyləncə mərkəzi "Fun city” idi. Bu da uşaqlar üçün nəzərdə tutulub. Artıq şəhərimizdə "Tom and Jerry” kafesinin də olduğunu öyrəndik. Yeni açılan kafedə qiymətlər heç də ucuz deyil. Menyuya nəzər salanda qiymətlərin baha olmasından daha çox diqqətimizi yeməklərin adları çəkdi. Məsələn menyuda toyuq dürümü, lahmacun, sandviç, növ-növ salat və pizzalarla yanaşı, starters və main course adı altında yemək növləri də var. Kafedə italyan mətbəxindən çeşidli makaron yeməkləri də üstünlük təşkil edir. Qiymətlərə gəlincə toyuq dürümü və lahmacun 2 manat, salatlar 2-8 manata qədər, müxtəlif desertlər 2-4 manat, uşaqların çox sevdiyi meyvəli dondurma isə 4 manatdır. Kafenin inzibatçısı Sultan Məmmədovdan menyuda əcnəbi mətbəxinə aid olan yeməklərin üstünlük təşkil etməsinin səbəbini öyrənə bilmədik. İnzibatçı yalnız onu bildirdi ki, burda uşaqlar yeyib-içməklə yanaşı, istədikləri qədər əylənə də biləcəklər. Onlar üçün cizgi film qəhrəmanları və şən klounların iştirakı ilə şou-proqramlar da təşkil ediləcək. Kafedə müxtəlif maraqlı oyuncaqlar var. Uşaqlar onlarla istədikləri qədər oynaya biləcəklər.

"Luxury Palace”da bahalı içkilər və fantastik menyu quyməti

"Luxury Palace” hazırda Sumqayıtın ən böyük, lüks şadlıq saraylarından biri sayılır. Özünü sarayın işçisi kimi təqdim edən Elşad Rüstəmovdan suallarımıza güc-bəla ilə cavab ala bildik. Sarayın böyük zalı 700-750 nəfərlik qonaqlar üçün nəzərdə tutulub. Menyunun qiyməti isə 35 manatdan başlayır. Qiymətə görə menyunun tərkibi də dəyişir. "Luxury Palace”ın digər şadlıq evlərindən fərqi spirtsiz və spirtli içkilərin bahalı olmasındadır. E.Rüstəmovun dediyinə görə, bahalı olmasına baxmayaraq, sarayda toy edən çox olur. ”Luxury Palace”da 50 manatlıq bir menyu ilə, təxminən 700 nəfərlik qonaq üçün təşkil edilən toy məclisi 35000 manata başa gəlir.

Müşahidələrimizdən belə aydın oldu ki, Sumqayıtda bahalı məkanların xidmət keyfiyyəti yaxşı səviyyədədir, amma əla deyil. Kafe və restoranlar yemək və içkilərin keyfiyyətinə görə seçilir. Kifayət qədər bahalı geyim butikləri mövcuddur. Amma alıcı qıtlığı hiss olunur. Bəzi məkanlar rahatlığı və gözəlliyi ilə yanaşı, təmizliyi ilə də hər kəsi cəlb edir. Bəlkə də bu üzdən bahalı məkanların müştəriləri arasında sadə sumqayıtlılar da görünməyə başlayır. Belə çıxır ki, kasıb şəhərin sakinləri artıq "ucuz ətin şorbasını” yemək istəmirlər?! Təki ödədikləri pula görə əldə etdikləri servis ürəklərincə olsun.

Aytən Əli
Xeberle.com