Sumqayıtda avtobusların dəyişdirilməsi şəhərin nəqliyyat sferasında nəyi dəyişəcək?

Sumqayıt şəhərinə yeni avtobuslar gətiriləcək. Nəqliyyat nazirliyinin göstərişiylə 2015-ci ilin yanvar ayının 3-nə kimi şəhərin bütün xətlər üzrə hərəkət edən marşrutlarıda nə qədər köhnə avtobus və marşrut taksilər var, hamısı istismardan çıxarılacaq. Əvəzində isə xəttə yeni avtobuslar buraxılacaq.
Bu barədə məlumatı Xeberle.com-a Sumqayıt şəhər Nəqliyyat Departamentinin sədri Anar Səfərli verib.
Şəhərə gətiriləcək avtobusların hansı markada olması və dəqiq sayı barədə ətraflı məlumat departamentə daxil olmayıb. A.Səfərlidən aldığımız daha bir xəbərə görə Sumqayıt bağları və Saray qəsəbəsinə gedən marşrutlardakı avtobuslar da yeniləri ilə əvəz ediləcək. Əgər yeni müasir tipli avtobuslar bağlar yoluna girə biləcəksə, o halda bağlara gedən avtobusların da dəyişilməsi mümkün ola biləcək. Yeni ildə şəhərimizin küçələrində müasir tipli və təzə avtobuslar görmək çox sevindiricidir.

Avtobusların yenilənməsi nəqliyyatda hər gün rastlaşdığımız problemlərin həll edilməsinə təsir edəcəkmi?
Sürücülərin sərnişinlərlə kobud münasibəti, sürücülərin bir-birilə etik çərçivəyə sığmayan mübahisələri, təhlükəli yarışları, sürət həddini aşmaq, sərnişinlərin avtobuslara rahat minib-düşə bilməmələri, dayanacaqlar olduğu halda dayanacaqdan kənar yerlərdə avtobusların saxlanılması və s. kimi problemlər sumqayıtlıların nəqliyyatda üzləşdikləri gündəlik həyat hadisələrinə çevrilib.
Anar Səfərli nəqliyyatda bu kimi problemlərlə rastlaşan sərnişinlərə şikayətləri ilə bağlı şəhər nəqliyyat departamentinə və avtobusların içərisində göstərilən "Qaynar xətt”in telefon nömrələrinə zəng edə biləcəklərini bildirdi.
Amma bir çox sərnişin və sürücülər belə hesab edirlər ki, sürücünün marşrut xəttindən uzaqlaşdırılması və ya hər hansı bir şəkildə cəzalandırılması çıxış yolu deyil.

Nəqliyyatda mövcud olan problemlərin kökündə konkret məbləğ - plan, onun ödənilməsi durur. Problemin həll edilməsi üçün öncə hər bir marşrut üçün təyin edilən plan azaldılmalıdır. Çünki marşrut xəttinə çıxan sürücünü təhlükəsizlik məsələləri, yaxud sərnişinləri rahat şəkildə daşımaq yox, yalnız günün sonunda ödəyəcəkləri plan düşündürür.

Aytən Əli
Xeberle.com